बझाङमा पहिरोमा पुरिएर एकै परिवारका चार जनाको मृत्यु

धनगडी । बझाङमा पहिरोमा पुरिएर एकै परिवारका चार जनाको मृत्यु भएको छ ।

सोमबार बिहान १ बजे बुङ्गल नगरपालिका–१० स्थित टुमेडामा पहिरोले वीरबहादुर धामीको घर पुर्दा ४ जनाको ज्यान गएको सुदुरपश्चिम प्रदेश प्रहरी प्रमुख डीआईजी रविन्द्र केसीले जानकारी दिए ।

उनका अनुसार घरमा सुतेका १० जनामध्ये ६ जना भागेर बचेका छन् । उनीहरु केही सामान्य घाइते भएका छन् । पहिरोले पुरिएर मृत्यु भएका काली धामी, गोल्की धामी, आकृती धामी र लक्ष्मी धामीको शव फेला परेको केसीले जानकारी दिए ।

घटनालगत्तै नजिकको प्रहरी युनिट बुङ्गलबाट वरिष्ठ सई बीरबहादुर ढगुन्नाको नेतृत्वको टोली घटनास्थल पुगेको थियो ।

सोमबार बिहान बझाङ जिल्लाका सहायक सीडीओ, डीएसपी फणीन्द्र भण्डारी र रेडक्रसको टोली घटनास्थलतर्फ गएको छ ।