हसिनाको पहिलो बयान : सेन्ट मार्टिन टापु अमेरिकालाई नदिँदा देश छोड्नुपर्‍यो

काठमाडौं । बंगलादेशको प्रधानमन्त्री पदबाट राजीनामा दिएको ६ दिनपछि शेख हसिनाले सेन्ट मार्टिन टापु अमेरिकालाई नदिँदा आफ्नो सरकार ढालिएको दाबी गरेकी छन् ।

इकोनोमिक टाइम्सका अनुसार हसिनाले आफ्ना नजिकका सहयोगीहरूलाई भनिन्, ‘म कट्टरपन्थी हिंसाका कारण मृत्यु हुनेको संख्या बढ्न दिन चाहन्नथें । उनीहरू विद्यार्थीको शवबाट शक्ति प्राप्त गर्न चाहन्थे । तर, मैले त्यसो हुन दिइनँ ।’

हसिनाले थप भनिन्, ‘अमेरिकी नियन्त्रणमा सेन्ट मार्टिन टापु र बंगालको खाडी दिएर मैले आफ्नो कुर्सी जोगाउन सक्थें । म देशवासीलाई कट्टरपन्थीबाट भ्रममा नपर्न अपील गर्छु । अल्लाहको कृपाले छिट्टै बंगलादेश फर्कनेछु ।’

विद्यार्थी आन्दोलनको बारेमा कुरा गर्दै हसिनाले भनिन्, ‘मैले उनीहरूलाई रजाकार भनेकी थिइनँ । मेरो शब्दलाई देशमा अस्थिरता ल्याउन गलत अर्थ लगाइयो । बंगलादेशका जनताको निर्दोषताको फाइदा उठाएर यो षड्यन्त्र रचिएको हो ।’

राजीनामा दिएपछि हसिनाले यस विषयमा कुनै बयान दिएको यो पहिलो पटक हो ।

हसिनाले यसअघि जुन २०२१ मा बंगाली अखबारमा अमेरिकाले बंगलादेशसँग सेन्ट मार्टिन आइल्याण्ड मागेको दाबी गरेकी थिइन् । अमेरिका यहाँ सैन्य आधार बनाउन चाहन्छन् ।

बंगलादेश वर्कर्स पार्टीका अध्यक्ष राशिद खान मेननले पनि संसद्‌मा अमेरिका सेन्ट मार्टिन टापु अधिग्रहण गर्न चाहन्छ र क्वाडको सदस्य बन्न दबाब दिइरहेको बताएका थिए ।

बंगलादेशी राजनीतिमा यति धेरै तरंग मच्चाएको सेन्ट मार्टिन टापु जम्मा ३ वर्ग किलोमिटरको टापु हो । म्यानमारबाट यसको दूरी मात्र ५ माइल छ । जुन २०२३ मा हसिनाले विपक्षी बीएनपी पार्टी सत्तामा आएमा सेन्ट मार्टिन बेच्ने बताएकी थिइन् ।

उनी हाल भारतमै रहेको बताइन्छ । विद्यार्थी आन्दोलनपछि उनी राजीनामा दिएर देशबाट बाहिरिएकी थिइन् ।