बेरोजगारीको कारण साइबर अपराध, रहस्यमयी अनुसन्धानको कथा: अपरेसन जाभा

काठमाडौं । हरेक सिनेमाको आफ्नै दर्शक वर्ग हुन्छ । कुन फिल्म कस्ता दर्शकलाई मन पर्छ भन्ने ठेगान हुँदैन, तर रहस्यमयी र थ्रिलर विधाका फिल्महरूले प्रायः सबैलाई आकर्षित गर्ने क्षमता राख्छन् ।

राम्रा थ्रिलर फिल्महरूले सुरूआती पाँच मिनेटमै दर्शकलाई यसरी तान्छन् कि अन्तसम्म पुग्न नपाई छोड्न सकिँदैन ।

केही फिल्महरूमा एउटाभन्दा धेरै उपकथा हुन्छन्, जसले मुख्य कथालाई थप रोचक बनाउँछन् । आजको शनिबार सिनेमामा हामीले त्यस्तै एउटा फिल्म सिफारिस गरेका छौँ—अपरेसन जाभा । अपरेसन जाभा बलियो सामाजिक सन्देशसहित, केही कमेडी, रोमान्स, र ड्रामासँग मिसिएको उत्कृष्ट थ्रिलर फिल्म हो ।

यो दक्षिण भारतीय (मलयालम) क्राइम थ्रिलर फिल्म हो, जसले दर्शक र समीक्षक दुवैबाट प्रशंसा पाएको छ। फिल्मले आइएमडीबीमा ८.१ को उत्कृष्ट रेटिङ प्राप्त गरेको छ।

फिल्मको कथा कोचीको साइबर सेल प्रहरी स्टेसनमा गरिएका अनुसन्धानहरूमा केन्द्रित छ । फिल्ममा देखाइएका विभिन्न घटनाहरू वास्तविक घटनामा आधारित छन् ।

एन्थोनी र विनय नामका दुई साथी, जो इञ्जिनियरिङ सकिसकेका बेरोजगार युवाहरू हुन्, जागिरको खोजीमा हुन्छन् । उनीहरू एक दिन कोचीको साइबर सेल प्रहरीकहाँ पुग्छन् र पहिले नै समाधान भएको ठानिएको मुद्दाबारे नयाँ खुलासा गर्छन् ।

सुरूमा प्रहरी उनीहरूको कुरा पत्याउँदैनन् र बन्द भइसकेको मुद्दा भनेर पन्छाउन खोज्छन् । तर एन्थोनी र विनय हार मान्दैनन् र आफ्नो तर्कलाई सही साबित गर्न लागिपर्छन् । अन्ततः उनीहरूले उक्त चर्चित मुद्दाको वास्तविक अपराधीसम्मको पर्दाफास गर्छन् ।

उनीहरूको कामबाट साइबर सेलका हाकिम प्रभावित हुन्छन् र उनीहरूलाई अस्थायी रूपमा काम गर्ने मौका दिन्छन् । जागिर नपाइरहेका बेला यो अवसर पाएर एन्थोनी र विनय दुवै खुसी हुन्छन् । तर, साइबर सेलमा सबैले उनीहरूलाई समर्थन गर्दैनन् । केहीले उनीहरूलाई हेप्छन् र उडाउँछन् ।

तर, यी दुवै साथी धैर्यपूर्वक आफ्नो काममा जुट्छन् । अनुसन्धानको क्रममा उनीहरूले सूचना र प्रविधिको दुरुपयोग गर्दै गरिएका भयानक अपराधहरूको सामना गर्छन् । सामान्यतया सर्वसाधारणले प्रयोग गरिरहेका प्रविधिहरू अपराधीहरूले कसरी दुरुपयोग गरिरहेका छन् भन्ने कुरा उनीहरूले देख्छन् ।

यही क्रममा एक दिन यस्तो घटना हुन्छ, जुन उनीहरूको व्यक्तिगत जीवनसँग जोडिएको हुन्छ । त्यो घटना के हो ? एन्थोनी र विनयले त्यसलाई कसरी समाधान गर्छन् ? र, उनीहरूको भविष्य के हुन्छ ?

यी सबै जान्नका लागि अपरेसन जाभा फिल्म हेर्नुहोला ।