काठमाडौंमा खानेपानीको जारको मूल्य तोकियो

काठमाडौं । काठमाडौं उपत्यकामा बिक्री हुने पानीको अधिकतम खुद्रा मूल्य (एमआरपी) समान कायम राख्न सरकारले सूचित गरेको छ ।

उत्पादक कम्पनीहरूले उही प्रकारका गुणस्तर, नापतौल र परिमाणको पानीमा फरक–फरक एमआरपी लगाई बिक्री–वितरण भएको पाइएको भन्दै अधिकतम खुद्रा मूल्य (एमआरपी) समान कायम राख्न सूचित गराएको वाणिज्य, आपूर्ति तथा उपभोक्ता संरक्षण विभागले जनाएको छ ।

विभागका अनुसार काठमाडौं उपत्यकामा बिक्री हुने जार (२० लिटर)को मूल्य प्रतिगोटा अधिकतम ४७ रुपैयाँ तोकिएको छ । एक लिटरको बोतल पानीको मूल्य १६ रुपैयाँ तोकिएको छ ।

एमआरपीको नियम पालना नगरे कानूनअनुसार कारबाही गर्ने चेतावनी विभागले दिएको छ ।