महोत्तरीमा पुल भत्किँदा पूर्वपश्चिम राजमार्ग अवरुद्ध

जनकपुरधाम । महोत्तरीको बर्दिबासमा पुल भत्किँदा पूर्वपश्चिम राजमार्ग अवरुद्ध भएको छ ।

गएराति आएको बाढीले बर्दिवास नगरपालिका-५ माइस्थान जंगल क्षेत्रमा पर्ने बेलगाछी पुलमा क्षति पुग्दा पूर्व–पश्चिम राजमार्ग अवरुद्ध भएको हो । सडक अवरुद्ध हुँदा यात्रुहरु मर्कामा परेका छन् ।

बेलगाछी (ढुंग्रे खोला) पुलसँग जोडिएको दक्षिणतिरको सडकको ५–६ फिट भागको माटो बाढीले कटान गरेको जिल्ला प्रहरी कार्यालय महोत्तरीले जनाएको छ ।

सडकमा क्षति पुगेपछि रातिदेखि नै यातायात ठप्प रहेको छ । राजमार्गमा क्षति पुगेपछि माईस्थान चोकबाट डाइभर्सन गरिएको छ ।

माइस्थान चोकबाट गौशाला रोड हुँदै हुलाकी सडकमा निस्किएर कान्तिबजार, लक्ष्मीनियाँ हुँदै पुनः पूर्वपश्चिम राजमार्गमा निस्किने गरी व्यवस्था मिलाइएको छ ।