नेपालले दियो बरोडालाई १५७ रनको लक्ष्य

काठमाडौं। फ्रेण्डसीप कप टी–२० क्रिकेटमा नेपालले बरोडालाई १५७ रनको लक्ष्य दिएको छ।

भारतमा जारी खेलमा नेपालले पूरै ओभर खेलेर ६ विकेटको क्षतिमा १५६ रन बनाएको हो।

टस जितेर बरोडाले बलिङ रोजेसँगै नेपाल ब्याटिङमामा उत्रिएको थियो। पहिलो ५ विकेट गुमाएर धर्मराएको नेपाली ब्याटिङलाई सन्दीप जोरा र कुशल मल्लले सम्हालेका थिए।

नेपालका लागि मल्लले २५ बलमा अविजित ४० रन बनाए । सन्दीप जोराले १६ बलमा २९ रन बनाए। अनिल साह २५, कप्तान रोहित कुमार पौडेल १८, गुल्शन झा १३, कुशल भूर्तेल ९, आसिफ शेख ९ रनमा आउट भए ।

बरोडाका लागि बाबा खानले २ तथा मोहित मोङ्गिया र परिक्षित पतिदारले १–१ विकेट लिए।

फ्रेण्डसीप कपमा नेपाल, बरोडा र गुजरातको सहभागिता छ। २ हप्तापछि ओमानमा हुने एसीसी प्रिमियर कपको तयारी लागि नेपाल फ्रेण्डसीप कप खेल्न भारत पुगेको हो। पहिलो खेलमा नेपालले गुजरातलाई हराएको थियो ।