कीर्तिपुर क्रिकेट मैदानमा फ्लडलाइट जडानको प्रक्रिया सुरु, कहिले सकिएला काम ?

एकसाता अघि ‘आईसीसी विश्वकप लिग टू’मा नेपालले कीर्तिपुर मैदानमा सानदार प्रदर्शन गरेको थियो। त्योसँगै त्रिक्रेट मैदान व्यवस्थित गर्नुपर्ने भन्दै माग उठ्याे। सामान्य पूर्वाधार समेत नभएपछि घरेलु पूर्वाधारको बेथितिले चर्चा पाएसँगै प्रधानमन्त्री प्रचण्डको ध्यानाकर्षण भएको हो।

नेपाल भ्युज

कीर्तिपुर क्रिकेट मैदानमा फ्लडलाइट जडानको प्रक्रिया सुरु, कहिले सकिएला काम ?
कीर्तिपुरस्थित त्रिवि क्रिकेट मैदानको हालको अवस्था र फ्लडलाइट जडानपछि देखिने अवस्थाको एडिटेट फोटो

काठमाडौं। प्रधानमन्त्री पुष्पकमल दाहाल ‘प्रचण्ड’को निर्देशनमा राष्ट्रिय खेलकुद परिषद् (राखेप)ले कीर्तिपुरस्थित त्रिवि क्रिकेट मैदानमा फ्लडलाइट जडानको प्रक्रिया अघि बढाएको छ। रात्रिकालीन समयमा पनि खेल सञ्चालन गर्न मिल्ने गरी फ्लडलाइट जडानको प्रक्रिया द्रुत गतिमा सम्पन्न हुने जनाइएको छ।

सन् १९९८ मा निर्माण भएको त्रिवि क्रिकेट मैदानलाई अत्याधुनिक सुविधा सम्पन्न बनाउन फ्लडलाइट जडान गर्नुपर्नेछ। पभेलियन, डिजिटल स्कोरबोर्ड र प्यारापिट पनि निर्माण गर्नु बाँकी छ।

साता दिन अघि ‘आईसीसी विश्वकप लिग टू’मा नेपालले सोही रङ्गशालामा सानदार प्रदर्शन गरेको थियो। त्योसँगै त्रिक्रेट मैदान व्यवस्थित गर्नुपर्ने भन्दै दर्शकहरूले माग गरेका थिए। सामान्य पूर्वाधार समेत नभएपछि घरेलु पूर्वाधारको बेथितिले चर्चा पाएसँगै प्रधानमन्त्रीको ध्यानाकर्षण भएको हो।

यसको लागि आर्थिक वर्ष २०७९–०८० को बजेटमा फ्लडलाइट जडानका लागि १० करोड रुपैयाँ विनियोजन गरेको थियो। तर काम अघि बढ्न सकेको थिएन।

गतसाता ‘आईसीसी विश्वकप लिग टू’मा जितेका राष्ट्रिय टिमलाई बधाई दिँदै प्रधानमन्त्री प्रचण्डले त्रिवि मैदानमा फ्लडलाइट जडानका लागि निर्देशन दिएका थिए। आइतबार प्रधानमन्त्रीको स्वकीय सचिवसमेत रहेकी प्रचण्डपुत्री गङ्गा दाहालले फेसबुकमा त्रिवि मैदानमा फ्लडलाइट जडानको काम द्रुत गतिमा अघि बढ्ने बताएकी छिन्।

क्रिकेटका दर्शक रूखमा, खेलकुदको बजेट मुखमा

क्रिकेट मैदानमा फ्लडलाइट जडान गर्ने स्थानको माटो परीक्षण सम्पन्न भइसकेको राखेपका प्रशासन प्रमुख मधुसूदन बस्नेतले जानकारी दिए। फ्लडलाइट जडानको लागत मूल्याङ्कन सुरु गरिएको उनले बताए। उनले भने, ‘‘अब तत्कालै यसको लागि टेन्डर सुरु गर्नेछौँ। हामीसँग त्यो काम गर्ने सीप र दक्षता नभएकाले विदेशी विशेषज्ञहरूसँग समन्वय गरी लागत संकलनको तयारी गरिरहेका छौँ।’’

निर्माण सम्पन्न भएपछि मैदानमा रातिको खेल सञ्चालन गर्न सहज हुनेछ भने दर्शकलाई पनि सहज हुने छ। तर यो काम तत्कालै नसकिने राखेपका अधिकारीहरू बताउँछन्। एक अधिकारी भन्छन् ‘‘लगत संकलन सक्न केही समय लाग्छ। टेन्टरको प्रक्रिया सुरु हुँदैछ। प्रक्रिया पुर्‍याउनको लागि टेन्टर आह्वानको समय र पूर्वाधार निर्माणको समय केही महिना लाग्छ। काम सकिँदा अर्को आर्थिक वर्ष भेट्ने देखिन्छ।’’

गत साता प्रधानमन्त्री प्रचण्ड ‘विश्वकप लिग २’ अन्तर्गत नेपाल र यूएईको खेल हेर्न कीर्तिपुरस्थित त्रिवि क्रिकेट रङ्गशाला पुग्दा ‘रङ्गशाला चाहियो, रङ्गशाला चाहियो’ भन्दै दर्शकतर्फबाट चर्को नारा गुञ्जिएको थियो।

सन् १९९८ बाट अन्तर्राष्ट्रिय प्रतियोगिता सुरु भएको त्रिवि मैदानले अहिलेसम्म आफ्नो रूप फेर्न सकेको छैन। एसीसी ट्रफीअन्तर्गत पपुवा न्युगिनी र बङगलादेशबीचको खेलबाट यहाँ अन्तर्राष्ट्रिय प्रतियोगिताको रेकर्ड राख्न सुरु गरिएको थियो। ‘आईसीसी मेन्स क्रिकेट वर्ल्डकप लिग–टु’ मा नेपाललाई ऐतिहासिक सफलता पनि यही मैदानबाटै प्राप्त भएको छ। नेपालले पछिल्ला १२ मध्ये ११ मा जित निकाल्यो, जुन उपलब्धि अद्वितीय हो।

अन्तर्राष्ट्रिय क्रिकेट रङ्गशाला : परिबन्धको चक्रव्यूहमा धुर्मुस-सुन्तली

यसअघि, टीयू मैदानमा खेलेको २ सीरिजमा नेपालले क्लिनस्विप गरेको थियो। हालै सम्पन्न सिरिजमा युएईविरुद्ध २ सय ४९ रनको लक्ष्य पछ्याउने क्रममा नेपालले १ सय ७७ रनको जित हासिल गरेको थियो। घरेलु मैदानमा नेपालले निकालेको सबैभन्दा फराकिलो अन्तरको जित हो।

यस्तै, पीएनजीविरुद्ध ९६ रनको लक्ष्य पछ्याउने क्रममा २ सय ५४ बल बाँकी रहँदा १ विकेट गुमाएर नेपालले जित हात पारेको थियो। यो पनि नेपालको लागि कीर्तिमानी जित हो।

खेलकुद क्षेत्र देशलाई अन्तर्राष्ट्रिय क्षेत्रमा चिनाउने विषय हो। त्यही माथि यही मैदान अन्तर्राष्ट्रिय खेल हुने एक मात्र मैदान हो। अन्तर्राष्ट्रिय प्रतियोगितामा नेपाली खेलाडीले प्रतिस्पर्धा गर्दा सधैँ देशको प्रतिष्ठासँग जोड्ने गरिए पनि मैदानको स्तर उन्नति हुन सकेको थिएन।


Comment

Leave a Reply

Your email address will not be published. Required fields are marked *

थप समाचार

Copyright © 2024 Digital House Nepal Pvt. Ltd. - All rights reserved