अन्तर्वार्ता

एकीकृत समाजवादीले गृहसहित ४ मन्त्रालय छाड्दैन : राजेन्द्रप्रसाद पाण्डे 

प्रधानमन्त्री पुष्पकमल दाहाल ‘प्रचण्ड’ ले उपराष्ट्रपतिको निर्वाचनलगत्तै मन्त्रिपरिषद्लाई पूर्णता दिने तयारी गरेका छन् ।

एकीकृत समाजवादीले गृहसहित ४ मन्त्रालय छाड्दैन : राजेन्द्रप्रसाद पाण्डे 

काठमाडौं । प्रधानमन्त्री पुष्पकमल दाहाल ‘प्रचण्ड’ ले उपराष्ट्रपतिको निर्वाचनलगत्तै मन्त्रिपरिषद्लाई पूर्णता दिने तयारी गरेका छन् ।

यससँगै सत्तारूढ १० दलीय गठबन्धनमा रहेका दलहरू पनि सुषुप्तरूपमा तयारीमा जुटेका छन् । त्यसमा माधवकुमार नेपाल नेतृत्वको नेकपा (एकीकृत समाजवादी) ले आफूले गृहसहित ४ मन्त्रालय नछाड्ने अडान राखेको छ ।

गठबन्धनमा रहेका अन्य सबै दलहरूले आ-आफ्नो भाग पाएको उल्लेख गर्दै एकीकृत समाजवादीका नेताहरूले भन्ने गरेका छन्— अबको पहिलो रोजाइ हाम्रो हुनुपर्छ ।

त्यसो त एकीकृत समाजवादीसँग प्रतिनिधि सभामा १० सांसदमात्रै छन् । यस्तो अवस्थामा उसले ४ मन्त्रालय पाउने सम्भावना हुन्छ ? किन चाहँदैन ४ मन्त्रालयभन्दा घट्न ? यदि उसले खोजेको मन्त्रालय सङ्ख्या र मन्त्रालय पाएन भने उसले के गर्छ ?

उसो त एकीकृत समाजवादीका अध्यक्ष माधवकुमार नेपाल प्रधानमन्त्री बन्ने चर्चा पनि सतहमा छ । यो सम्भव छ, के छ गठबन्धनमा भएको सहमति यसबारे ? यी नै सन्दर्भमा हामीले एकीकृत समाजवादीका उपाध्यक्ष राजेन्द्रप्रसाद पाण्डेसँग कुराकानी गरेका छौँ ।

सत्तारूढ गठबन्धन उपराष्ट्रपतिको निर्वाचनलगत्तै मन्त्रिपरिषद्लाई पूर्णता दिने तयारीमा देखिन्छ, एकीकृत समाजवादीमा यसबारे छलफल भएको छ ?

अनौपचारिक रूपमा त छलफलहरू हुने नै भए । औपचारिकरूपमा चाहिँ मन्त्रिपरिषद्‌लाई पूर्णता दिनेबारे पार्टीमा छलफल भएको छैन । हामी उपराष्ट्रपतिको निर्वाचनलगत्तै पार्टीमा पनि, गठबन्धनमा पनि छलफल अघि बढाउँछौँ ।

मन्त्रिपरिषद्लाई पूर्णता दिँदैगर्दा एकीकृत समाजवादी ‘डिमान्ड’चाहिँ के हो ?

हामी गठबन्धनको चौथो ठूलो दल हौँ । त्यहीअनुसार हामी आफ्ना मागहरू गठबन्धनमा राख्नेछौँ र छलफल गर्नेछौँ ।

त्यहीअनुसार भनेको… ?

हामीले ४ मन्त्रालयको दाबी राख्नेछौँ र त्यसमा गठबन्धनमा सहमति जुट्नुपर्छ भन्ने मान्यता हाम्रो छ । किन पनि भने गठबन्धनमा रहेका दलहरूले केही न केही लिएकै छन् । कांग्रेसले राष्ट्रपति लिएको छ, माओवादी केन्द्र त सरकारको नेतृत्वकर्ता दल नै भइहाल्यो । त्यसमा अरु दलहरूले पनि आफ्नो हैसियतअनुसारको भाग पाएको छन् । तर, एकीकृत समाजवादी त्यसमा मानेमा बाहिर छ । त्यसमा सन्तुलन मिल्नुपर्छ भन्ने हाम्रो छ । त्यसैले हामी ४ मन्त्रालयको दाबी छाड्दैनौँ ।

४ मन्त्रालयचाहिँ कुन-कुन हुन् नि ?

हामीले गृहसहित शिक्षा, ऊर्जा र श्रमको दाबी प्रस्तुत गर्छौँ । र, त्यसमा गठबन्धनमा सहमति जुट्नुपर्छ ।

गठबन्धनमा धेरै दलहरू छन्, त्यसमा सबैलाई नै भाग पुर्‍याउनुपर्ने होला । अनि तपाईंहरूले कसरी पाउनुहुन्छ यी महत्त्वपूर्ण मन्त्रालयहरू ?

छन् गठबन्धनमा दलहरू । तर, सबैले आ-आफ्नो भाग पाइसकेका छन् भन्दा फरक पर्दैन । अब सबैले पाइसकेपछि पाउन बाँकीलाई त दिनुपर्छ होला नि त, कि के हो ? शक्ति सन्तुलन र समीकरण मिलाउँदाखेरि जाने भनेको त्यसैगरी नै हो ।

यदि तपाईंले भन्नुभएको गृह, शिक्षा, ऊर्जा, श्रमलगायतका मन्त्रालयहरू पाउनुभएन भने तपाईंहरू के गर्नुहुन्छ ?

त्योबारे पछि नै निर्णय होला । यसमा अहिल्यै भन्न सकिन्न ।

अध्यक्ष माधवकुमार नेपाल प्रधानमन्त्री बन्ने चर्चा पनि चल्यो नि, यसबारे गठबन्धनमा सहमति भएको होर ?

यसबारे मलाई खासरूपमा जानकारी छैन । थप छलफल गर्दै जाने कुरा हो यो ।

उपराष्ट्रपति चुनावलगत्तै मन्त्रिपरिषद् विस्तार


Comment

Leave a Reply

Your email address will not be published. Required fields are marked *

थप अन्तर्वार्ता

लोकप्रिय (यो साता)

Copyright © 2024 Digital House Nepal Pvt. Ltd. - All rights reserved