पाककलामा आधारित नयाँ टेलिभिजन रियालिटी शो ‘सेफ नेपाल’ आउँदै

काठमाडौं। हिमालय टेलिभिजनबाट प्रसारण हुन लागेको पाककलामा आधारित नयाँ टेलिभिजन रियालिटी शो ‘सेफ नेपाल’को छायांकन सुरु भएको छ । रियालिटी शोका निर्माता धर्मराज पाण्डे, सेफ सन्तोष शाह, गणेश ढकाल र भान्से लक्ष्मण भण्डारीसहितले जनकपुरको प्रसिद्ध जानकी मन्दिरमा पूजाआजा गर्दै छायांकन सुरु गरेका हुन् ।

सेफ सन्तोष शाह तथा अन्य सेफको परिचय भिडियो छायांकन सुरु भएको जानकारी निर्माता पाण्डेले दिए । प्रि-अडिसनबाट छनोट भएका प्रतियोगीको अभिमुखीकरण र भिडियो कभरेज पनि थालिएको छ । ओरिएन्टेसनसँगै लाइभ अडिसनको सुटिङ सुरु भएको शो चैत महिनादेखि प्रसारण हुने भएको हो ।

शोमा १८ एपिसोड हुनेछ । एक सय प्रतियोगीले शोमा प्रतिस्पर्धा गर्नेछन् । विजेताले २५ लाख रुपैयाँ प्राप्त गर्नेछन भने १० लाखभन्दा बढीको उपहार दर्शकले क्विज सेग्मेन्टमार्फत प्राप्त गर्नेछन् ।

शोले मनोरञ्जन, नेपाली खानाको ज्ञान, खाना पस्कने कला लगायतका विषयलाई समेट्ने जनाइएको छ ।