काठमाडौं। बलात्कारको अभियोग लागेको क्रिकेटर सन्दीप लामिछानेलाई राष्ट्रिय टोलीमा फर्काइएको भन्दै विरोध प्रदर्शन भएको छ ।
शनिबार दिउँसो माइतीघर मण्डलामा नेपाल क्रिकेट संघ (क्यान)विरुद्ध प्रदर्शन भएको हो । केही युवायुवतीहरूले माइतीघरमा जम्मा भएर क्यानविरुद्ध प्रदर्शन गरेका हुन् ।
क्यानले बलात्कारको आरोप लागेका क्रिकेटर लामिछानेलाई समेट्दै विश्वकप क्रिकेट लिग टु अन्तर्गत नेपालमा हुने नामिबिया र स्कटल्यान्डसँगको खेलका लागि २० जनालाई क्याम्पमा बोलाएको थियो ।
क्रिकेटर लामिछाने शुक्रबारदेखि नियमित अभ्यासमा छन् । बलात्कारको आरोप लागेपछि सन्दीपलाई क्यानले निलम्बन गरेको थियो । गत मंगलबार पोखरामा बसेको क्यानको बोर्ड बैठकले नेपालको क्रिकेटलाई उकास्नका लागि सन्दीपलाई खेलाउनैपर्ने बाध्यता रहेको भन्दै निलम्बन फुकुवा गरेको थियो ।
बैठकले सन्दीपमाथिको निलम्बनन फुकुवा गर्दै उनलाई प्रशिक्षणमा बोलाएको थियो । उच्च अदालत पाटनले जिल्ला अदालतको पुर्पक्षका लागि थुनामा राख्ने आदेश उल्ट्याउँदै सन्दीपलाई २० लाख धरौटीमा रिहा गरेको थियो । उनलाई क्रिकेट खेल्न रोक लगाइएको छैन ।
Facebook Comment
Comment