राष्ट्र बैंकले साढे १० अर्बको ट्रेजरी बोलकबोल गर्दै

नेपालभ्युज

काठमाडौ‌ं। नेपाल राष्ट्र बैंकले सोमबार साढे १० अर्ब रुपैयाँ बराबरको ट्रेजरी बिलको बोलकबोल गर्ने भएको छ । बैंकले ९१ दिने र ३६४ दिने गरी दुई किसिममा कुल १० अर्ब ६० करोड रुपैयाँ बराबरको ट्रेजरी बोलकबोल गर्ने भएको हो ।

सूचनाअनुसार सोमबार दिउँसो २ बजे ट्रेजरीको बोलकबोल हुनेछ । इच्छुक बैंक तथा वित्तीय संस्थाहरूले तोकिएको समयभित्र अनलाइन आवेदन दिन सक्नेछन् । ट्रेजरीको बिक्री भने माघ १० गते मंगलबार हुनेछ । केन्द्रीय बैंकका अनुसार कुल ट्रेजरीमध्ये ३ अर्ब ६० करोड रुपैयाँ नवीकरण र ७ अर्ब रुपैयाँ नयाँ ट्रेजरी जारी गर्न लागिएको हो ।

यसअघि, केन्द्रीय बैंकले माघ २ गते ९१ दिनका लागि ५ अर्ब २० करोड रुपैयाँको ट्रेजरी जारी गरेको थियो । प्रस्तावित ट्रेजरीका लागि अधिकतम ११.२१ प्रतिशत र न्यूनतममा ९.५० प्रतिशतको ब्याजदर अफर भएकोमा बैंकले १०.५८६१ प्रतिशतमा ट्रेजरी बिक्री गरेको थियो ।