दलको नेता छनोट गर्न कांग्रेसलाई सुदूरपश्चिममा सकस

धनगढी। सुदूरपश्चिम प्रदेशमा सबैभन्दा ठूलो दल नेपाली कांग्रेसले अहिलेसम्म संसदीय दलको नेता छनोट गर्न सकस भएको छ ।

एमाले माओवादी नागरिक उन्मुक्ति र नेकपा एकीकृत समाजवादीले दलको नेता छनोट गरी प्रदेश सरकारको नेतृत्वमा दाबी गरिरहँदा प्रदेशमा सबैभन्दा ठूलो दलका रूपमा रहेको नेपाली कांग्रेसले अझैसम्म दलको नेता छनोट गर्न सकेको छैन ।

सुदूरपश्चिम प्रदेश सभामा स्वतन्त्र एक सांसदसहित ६ वटा पार्टीमध्ये अन्य सबै दलले सर्वसम्मत रूपले दलको नेता छनोट गरिसक्दा कांग्रेसमा आकांक्षी धेरै भएको हुँदा नेता चयनमा ढिलाइ भइरहेको हो ।

अहिले कांग्रेसका आधा दर्जन प्रदेश सभा सदस्य दलको नेता बन्न लागिपरेका छन् । यहाँ कांग्रेसमा पार्टी सभापति शेरबहादुर देउवाका भतिजा प्रकाशबहादुर देउवासहित बहादुर सिंह थापा, दिवानसिंह विष्ट, कमलबहादुर शाह, प्रकाशबहादुर बम र मेघराज खड्का गरी ६ जनाले संसदीय दलको नेतामा दाबेदारी गरेका छन् ।

२८ गते प्रदेश सभाको बैठक बस्दै छ उक्त बैठकले सभामुख चयन गर्नेछ । त्योभन्दा अघि नै दलको नेता चयन गरिसक्ने कांग्रेसको तयारी छ । अघिल्लो प्रदेश सभा निर्वाचनमा तेस्रो स्थानमा रहेको कांग्रेस अहिले प्रत्यक्षतर्फ १२ र समानुपातिकतर्फ ७ सहित जम्मा १९ सिटसहित पहिलो स्थानमा छ ।

सुदूरपश्चिममा नेपाली कांग्रेसका १९, माओवादी केन्द्रका ११, नेकपा एमालेका १०, नागरिक उन्मुक्ति पार्टीका ७, नेकपा एसका ४, राप्रपाका १ र स्वतन्त्र १ गरी ५३ सांसद छन् ।