जापानलाई पेनाल्टीमा हराउँदै क्रोएसिया विश्वकपको क्वाटरफाइनलमा

निर्धारित समय र थप गरिएको ३० मिनेटमा पनि खेल १–१ को बराबरी भएपछि पेनाल्टीबाट नतिजा निकालिएको हो ।

नेपालभ्युज

काठमाडौं। जापानलाई पेनाल्टी सुटआउटमा हराउँदै क्रोएसिया विश्वकप फुटबलको क्वाटरफाइनलमा पुगेको छ।

कतारको अल जनुब रंगशालामा सोमबार राति प्रतिस्पर्धात्मक खेलमा जापान पेनाल्टीमा ३–१ अन्तरले पराजित भयो ।

सन् २०१८ विश्वकपको उपविजेता क्रोएसियाको अनुभव यो पटक काम लाग्यो । उसले निर्धारित समयमा पछि परेको अवस्था उल्टाएर अन्तिम ८ मा स्थान पक्का गरेको हो ।

क्रोएसियाको लागि निकोला भ्लासिक, मार्सेलो ब्रोजोभिक र मारियो पासालिकले गोल गरे। जापानको लागि ताकुमा असानोले मात्रै गोल हाल्न सके । क्रोएसियाका गोलरक्षक डोमिनिकले ३ प्रहार छेके।

निर्धारित समयको ४३ औँ मिनेटमा माइडाले गोल गर्दै जापानलाई अग्रता दिलाएका थिए । तर ५५ औँ मिनेटमा पेरिसिकले गोल गर्दै खेल बराबरी गरे ।