कांग्रेस उपसभापति खड्काले देउवालाई भने–‘सत्तागठबन्धनको साझा प्रयत्न सफल भयो’

सुर्खेत। नेपाली कांग्रेसका उपसभापति पूर्णबहादुर खड्काले सत्तागठबन्धन दलको साझा प्रयत्न सफल भएको बताएका छन् । बुधबार गृहजिल्ला सुर्खेतबाट काठमाडौंमा पुगेर प्रधानमन्त्री तथा नेपाली कांग्रेसका पार्टी सभापति शेरबहादुर देउवालाई भेटमा सत्तागठबन्धन दलको साझा प्रयत्न सफल भएको बताएका हुन् ।

मंसिर ४ गते सम्पन्न प्रतिनिधिसभा र प्रदेशसभाको राजनितीक रूपमा ऐतिहासिक महानिर्वाचनको रूपमा महत्त्व राखेको निर्वाचनको अभियानमा कात्तिक ३१ गतेदेखि मंसिर १४ गते निर्वाचनमा आफू उम्मेदवार भएको सुर्खेत निर्वाचन क्षेत्र नं १ र कर्णाली प्रदेशमा रहेका यहाँका सबै जिल्लामा प्रतिनिधिसभा एमाले शून्यमा झरेको जानकारी उपसभापति खड्काले प्रधानमन्त्री देउवालाई गराएका थिए ।

‘कर्णाली प्रदेशका १० वटै जिल्लामा सत्तागठबन्धन दलहरूबीच सबैको साझा प्रयत्नबाट सत्तागठबन्धन दलहरूको बीच समन्वय र उच्चस्तरको समझदारी कायम गरी निर्वाचनमा नेकपा (एमाले) लाई प्रतिनिधिसभाको प्रत्यक्षतर्फ कुल १२ सिटमा शून्यमा झार्दै प्रदेशसभातर्फ २४ सिटमा ५ सिटमा सीमित पार्ने अभियान सम्पन्न भयो ।’

उनले भने,‘सुर्खेतबाट आजै संघीय राजधानी काठमाडौं गई त्रिभुवन विमानस्थलबाट सीधै बालुवाटार पुगेर पार्टीका आदरणीय सभापति तथा सम्माननीय प्रधानमन्त्रीज्यूलाई हार्दिक बधाई र शुभकामना दिएको छु ।’

उपसभापति खड्काले प्रधानमन्त्री देउवासँग समग्र निर्वाचनको विश्लेषण र विमर्शपछि, नयाँ सरकार गठनको केन्द्रीय प्रक्रियामा सक्रियता प्रारम्भ भएको जानकारी दिए ।