प्रमुख निर्वाचन आयुक्तको चेतावनी- बुथ कब्जा गरेर जित्ने नसोचे हुन्छ

काठमाडौं । प्रमुख निर्वाचन आयुक्त दिनेशकुमार थपलियाले बुथ कब्जा गरेर जित्ने कुरा नसोच्न चुनावमा सहभागी भएका पार्टी तथा उम्मेदवारलाई चेतावनी दिएका छन् । मंसिर ४ मा हुने प्रदेश तथा प्रतिनिधि सभा निर्वाचनको सन्दर्भमा बिहीबार आयोजित पत्रकार सम्मेलनलाई सम्बोधन गर्दै प्रमुख निर्वाचन आयुक्त थपलियाले यस्तो बताएका हुन् । ‘बुथ कब्जा गरेर जित्छु भन्ने कुरा नसोचे हुन्छ,’ उनले सम्बोधनका क्रममा भने ।

त्यसअघि उनले भने, ‘हामी सबैलाई थाहा छ, बुथ कब्जा गरेर जितेको नेताले तपाईं-हाम्रो रक्षा गर्दैन । जसले बुथ कब्जा गर्छ, ऊ लोकतान्त्रिक व्यवस्थामा कलह हुन्छ । अब हिजोजस्तो बुथ कब्जा गरेर जित्छु भनेर नसोच्दा हुन्छ, समय हिजोजस्तो छैन ।’

प्रमुख निर्वाचन आयुक्त थपलियाले घरमा हुने पूजा-आजाको कार्यक्रम ४ गतेपछि मात्र गर्न आग्रहसमेत गरे । ‘अब बाध्य नै पार्ने कुरा त भएन । तर मिल्छ भने ठूला-ठूला पूजाआजाको काम पनि मंसिर ४ गतेपछि मात्रै गर्न म सबैलाई आग्रह गर्छु । अझ उम्मेदवारको घर-आँगनमा त यस्तो कार्यक्रम हुनै भएन । उम्मेदवार त यसमा सचेत हुनैपर्छ । निर्वाचन सफल बनाउन सबैले आ-आफ्नै ठाउँबाट सहयोग गर्नुपर्छ,’ उनले भने ।

मंसिर २२ अगावै मतगणना सक्ने

प्रमुख निर्वाचन आयुक्त थपलियाले मंसिर २२ गतेअगावै मतगणना सक्नेगरी आयोगले तयारी गरिरहेकाे बताए । ‘मतपेटिका सङ्कलन गर्ने कार्य सम्पन्न भएलगत्तै मतगणनाको काम सुरू हुन्छ,’ उनले भने, ‘हामीले ३ दिनभित्र प्रत्यक्षतर्फको मतगणना र करिब ५ दिनभित्र समानुपातिकतर्फको मतगणना गर्ने भनेर सोचेका छौँ ।’

मंसिर २२ मा निर्वाचनको सम्पूर्ण प्रतिवेदन राष्ट्रपतिसमक्ष बुझाउनेगरी आयोग तयारीमा जुटिरहेको उनले बताए । ‘हामी सबैखाले मतगणना ८ दिनभित्र सक्ने र मंसिर २२ भित्र सबै प्रतिवेदन बोकेर हामी राष्ट्रपतिकहाँ जाने भनेर तयारीमा जुटेका छौँ ।’