काठमाडौं। आगामी पुस २९ गते रिलिज हुने साम्राज्ञी शाह तथा पुष्प खड्का स्टारर फिल्म ‘तिम्रो मेरो साथ’ को गीतमा टिकटक भिडियो प्रतियोगिता हुने भएको छ । यसका लागि फिल्मी टिमले टिकटक भिडियो प्रतियोगिताका लागि आह्वान गरेको छ । निर्माता रमेश एमके पौडेलको डेब्यु फिल्मले तिहारमा रिलिज गरेको ‘रुमालै बाटेर टाई बनाम’ बोलको गीतमा टिकटक भिडियो प्रतियोगिता घोषणा गरेको हो ।
फिल्मको यो गीतले युट्युबमा रिलिज भएको ७ दिनमा १.१ मिलियन भ्युज पार गरेको थियो । यस प्रतियोगितामा भाग लिन चाहने इच्छुकले गीतको बोलमा तीन वटा हयास ट्याग प्रयोग गरेर भिडियो बनाउनुपर्नेछ । सहभागीले ह्यास रुमालै बाटेर, ह्यास तिम्रो मेरो साथ,ह्यास रमेश एमके पौडेल ह्यासट्याग प्रयोग गर्नुपर्नेछ ।
सहभागीहरूले यी ह्यासट्यागको प्रयोग गरेर भिडियोलाई आफ्नै एकाउन्टमा अपलोड गर्नुपर्नेछ । यसको अन्तिम नतिजा पुस २६ गते घोषणा गरिनेछ । यो प्रतियोगिता फिल्मका अन्य गीतमा पनि ती गीत रिलिज भएसँगै क्रमशः लागू हुनेछ । फिल्ममा कुल ३ वटा गीत रहेका छन् ।
’रूमालै बाटेर टाई बनाम’ बोलको गीत सुभाष भुसालको संगीतमा तयार भएको हो भने शब्द वि पाण्डेले लेखेका हुन् । यस्तै गीतमा मेलिना राई र जगदिश समालको स्वर रहेको छ ।
Facebook Comment
Comment