मुद्दाको अन्तिम टुंगो नलागेसम्म चौधरी ग्रुपविरुद्ध समाचार नलेख्न अन्तरिम आदेश

काठमाडौं। चौधरी ग्रुपका बारेमा निरन्तर समाचार प्रकाशित गर्दै आएको जनआस्था साप्ताहिक र जनआस्था डटकमलाई पाटन उच्च अदालतले मुद्दाको अन्तिम टुंगो नलागेसम्म चौधरी ग्रुप र ग्रुप सम्बद्ध कम्पनीका बारेमा कुनै पनि समाचार नलेख्न अन्तरिम आदेश दिएको छ।

जनआस्था साप्ताहिक र जनआस्था डटकमले चौधरी ग्रुप, ग्रुपका अध्यक्ष विनोद चौधरी र ग्रुप सम्बद्ध कम्पनीहरूका बारेमा विभिन्न समाचारहरू प्रकाशित गर्दै आएको थियो।

आफूविरुद्ध श्रृखलाबद्ध झुटा समाचार लेखिएको भन्दै चौधरी ग्रुपले गत भदौ १३ गते उक्त पत्रिका एवं अनलाइनका प्रकाशक किशोर श्रेष्ठ र सम्पादक राजेन्द्र रिमालविरुद्ध ललितपुर जिल्ला अदालतमा गाली वेइज्यतीमा मुद्दा दायर गरेको थियो।

अदालतमा मुद्दा विचाराधीन रहेकै अवस्थामा पनि उक्त पत्रिका र अनलाइनले समाचार प्रकाशित गर्ने शृङ्खला जारी राखेपछि चौधरी ग्रुपले मुद्दाको किनारा नलागेसम्म यस्ता समाचार, टिप्पणी लेख्न नपाउने अन्तरिम आदेशको माग गर्दै असोज ५ गते पाटन उच्च अदालतमा निवेदन दिएको थियो।

शुक्रबार पाटन उच्च अदालतका माननीय न्यायधिश बालेन्द्र रुपाखेतीको एकल बेन्चले यस्तो आदेश जारी गरेको हो।