काठमाडौंका सार्वजनिक स्थानमा सुर्तीजन्य पदार्थ खानेलाई कडा कारबाही हुने

काठमाडौं । काठमाडौं महानगरपालिकाले सार्वजनिक स्थानमा सुर्तीजन्य पदार्थ सेवन गर्नेलाई अब कडा कारबाही गर्ने भएको छ ।

महानगरपालिकाले असोज १ गतेदेखि सार्वजनिक स्थानमा सुर्तीजन्य पदार्थ सेवन गर्न निषेध गरेको छ । यसको अवज्ञा गरेमा सुर्तीजन्य पदार्थ -नियन्त्रण र नियमन ऐन अन्तरगत कारबाही गर्ने महानगरपालिकाले चेतावनी दिएको छ ।

असोज १ गतेदेखि सार्वजनिक स्थानमा चुरोट, बिँडी, सिगार, तमाखु, सुल्फा, कक्कड, कच्चा सुर्ती, खैनी, गुट्खा, सुर्ती वा यस्तै प्रकारका अन्य पदार्थको नसा लिने वा सेवन गर्ने कार्यमा निषेध गरिएको महानगरले जनाएको छ ।

कस्तो छ कारबाहीको व्यवस्था ?

सार्वजनिक स्थलका व्यवस्थापकले धूमपान तथा सूर्ति सेवन गर्न नपाउने व्यहोराको सूचना सबैले देख्ने र पढ्न सक्ने गरी टाँस गर्नु पर्नेछ । त्यसो नगर्ने व्यवस्थापकलाई पाँच हजार रुपैयाँसम्म जरिवाना हुन्छ ।

यदि कसैले सार्वजनिक स्थलमा धूमपान वा सुर्तीजन्य पदार्थ सेवन गरेमा व्यवस्थापकले ती व्यक्तिलाई सार्वजनिक स्थलबाट बाहिर निकाल्ने वा एक सय रुपैयाँ जरिवाना तथा दुवै सजाय गर्न सक्ने कानुनी व्यवस्था छ ।