‘स्वतन्त्र’ भन्दै धमाधम दल बनाउँदै : मतदाताले स्वीकार्लान् ?

काठमाडौं।  संघ र प्रदेश निर्वाचनको मिति घोषणा भएसँगै दलहरू यतिबेला चुनावी अभियानको तयारीमा जुटेका छन् । योपटक स्वतन्त्र उम्मेदवार बन्न चाहनेको पनि लर्को लागेको छ । राजनीतिक पृष्ठभूमिभन्दा बाहिर पेसा व्यवसाय गरेकाहरू पनि स्वतन्त्र उम्मेदवारी दिन तछाड-मछाड गरिरहेका छन् ।

त्यसो त स्थानीय तहको निर्वाचनमा केही स्वतन्त्र उम्मेदवारले प्राप्त गरेको सफलताले पनि उनीहरूलाई हौस्याएको छ । स्वतन्त्र उम्मेदवार पनि एउटै चुनाव चिन्ह लिएर मैदानमा आउने तयारीमा छन् । स्वतन्त्र भनेर संगठित हुने क्रम बढ्दो छ । पछिल्लोपटक लौरो साझा चिन्हमा लड्ने भन्दै एउटा समूहले केही उम्मेदवार नै घोषणा गरिसकेको छ । उक्त समूहमा स्थानीय तहमा उम्मेदवारी दिएर अनुभव बटुलिसकेकाहरू पनि छन् ।

काठमाडौं महानगरको मेयरमा पराजित भएका सुमन सायमी  ‘स्वतन्त्र तथा वैकल्पिक शक्ति लौरो अभियान’ का हर्ताकर्ता छन् । स्थानीय निर्वाचनमा उनले १३ हजार ७७० मत ल्याएका थिए । उनले अब काठमाडौं ८ बाट उम्मेदवारी दिने घोषणा गरेका छन् ।

यस्तै, काठमाडौं ९ बाट विद्या श्रेष्ठ महर्जन, रुपन्देही–५ बाट भीष्म राना, रौतहट–१ बाट राहुल मिश्रा, काठमाडौं–५ बाट मधुसूदन पाठक (सितेबा), ललितपुर–३ बाट राजाराम तन्डुकार र भक्तपुर–२ बाट ‘दह्रो स्तम्भ लोकेन्द्र’ले प्रतिनिधिसभा निर्वाचनका लागि उम्मेदवारी घोषणा गरेका छन्। शिरीष गुरुङले पनि कास्की–२ बाट चुनाव लड्ने घोषणा गरेका छन् ।

स्वतन्त्र उम्मेदवारको संगठन बनाउँदै सायमी

अभियानको संयोजन गरिरहेका सुमन सायमीले दलको विकल्प दल नै भएको बताइरहेका छन् । यसको अर्थ अब स्वतन्त्र उम्मेदवारको पनि छुट्टै दल बनाउने उनीहरूको तयारी देखिन्छ । सायमी भन्छन्,  ‘संसदीय चुनाव भनेको नीति निर्माण गर्ने ठाउँमा जानुपर्छ। बहुमतको कदर हुन्छ त्यहाँ। एक व्यक्तिले नीति निर्माणको कानुन बनाउन सक्दैन,त्यसकारण दलको विकल्प दल नै हो, तर जनमानसमा जागेको वितृष्णा हटाउन दल एउटा माध्यम हो भन्ने बुझाउन जरुरी छ। दलीय व्यवस्था नै ठीक होइन भन्ने गलत हो भनेर बुझाउन जरुरी छ।’

यो अभियानलाई संरचना निर्माण गर्नुपूर्वको संगठन भनेर बुझ्न सकिने सायमीको तर्क छ । उनले भने ‘यो एउटा चुनाव चिन्ह ब्रान्डिङ गर्ने अभियान हो , हामीले हाम्रो अभियानमा जोडिने सबैलाई आफ्नो उद्देश्य बताएका छौं । विचार मिल्नेहरू हामीसँग जोडिनुहुनेछ ’ पार्टी संरचनामै बदल्ने भएपनि अहिल्यै हतार भने नगर्ने उनले जनाए । यो निर्वाचनपछि पार्टी संरचना बनाउने अभियानकर्ताको योजना देखिन्छ ।