बाबुराम बाहिरिएपछि जसपाको बैठक-निर्वाचनका लागि ११ बुँदे कार्ययोजना

काठमाडौं। जनता समाजवादी पार्टी नेपालले निर्वाचनमा विजय हासिल गर्नका लागि ११ बुँदै कार्ययोजना बनाएको छ। डा. बाबुराम भट्टराई समूह बाहिरिएपछि पार्टीको राजनीतिक समितिको प्रथम बैठकमा प्रस्तुत प्रस्तावमा भाद्र मसान्तसम्ममा सबै क्षेत्र समन्वय समितिहरू पुनर्गठन गर्नेदेखि सवै तहका समितिहरूको नियमित बैठकको आयोजना गर्ने कार्ययोजना बनाएको छ।

निर्वाचनमा विजय हासिल गर्नका लागि पार्टीसँग बलियो सङ्गठनात्मक शक्ति, अनुशासित नेता–कार्यकर्ताको पङ्क्ति तथा पार्टी, योग्यतम उम्मेदवारहरू र एक्काइसौँ शताब्दी सुहाउँदो सशक्त प्रचार प्रसारको आवश्यकता पर्ने उल्लेख गर्दै आश्विन १५ गतेभित्र पालिका समिति र ३० गतेभित्र पालिकाका सवै वडामा वडा समिति र पार्टी सम्पर्कमा रहेका सम्भव टोल, वस्ती र बुथहरूमा प्रारम्भिक समितिहरू गठन गर्ने कार्ययोजना छ।

भाद्र मसान्तभित्र गठन हुन बाँकी जन वर्गीय सङ्गठनहरूको प्रदेश समिति र पहिचानमा आधारित राष्ट्रिय समितिहरू गठन गर्ने र गठन भई सकेका सङ्गठनहरू जिल्लामा विस्तार गर्ने योजना छ।
समाजका स्वतन्त्र, प्रतिष्ठित, प्रबुद्ध व्यक्तिहरूलाई विशेष समारोह आयोजना गरी पार्टी प्रवेश गराउने समेत पार्टीको लक्ष्य छ।

हरेक बैठकमा कामको रिपोर्टिङ लिने र कार्य सम्पादन कमजोर भएको ठाउँका लागि थप योजना बनाउनेदेखि जिल्ला तहको पार्टी कार्यालय व्यवस्थित रूपमा सञ्चालन गर्ने र प्रत्येक पालिका र वडाहरूमा पनि निर्वाचन केन्द्रित कार्यालय खोल्ने बैठकमा प्रस्तुत योजनामा उल्लेख छ।

काठमाडौँमा दुई दिनसम्म बसेको जसपा बैठकले सबै गतिविधि चुनाव केन्द्रित गर्ने भन्दै नेताहरूको जिम्मेवारीमा हेरफेर र मनोनयन गरेको छ। सात वटा भौगोलिक तथा अन्य जातीय प्रदेश समेत गरी २० प्रादेशिक इन्चार्ज सह-इन्चार्जहरू पनि तोकिएका छन्।