प्रचण्ड, भट्टराई र नेपालबीच समाजवादी केन्द्र बनाउने विषयमा छलफल

काठमाडौं। समाजवादी केन्द्र बनाउने विषयमा नेकपा माओवादी केन्द्रका अध्यक्ष पुष्पकमल दाहाल प्रचण्ड, डा. बाबुराम भट्टराई र माधव नेपालबीच छलफल भएको छ ।
जनता समाजवादी पार्टीबाट बाहिरिने क्रममा रहेका डा. बाबुराम भट्टराईलाई प्रचण्डले पार्टी एकताको लागि राखेको प्रस्ताव अस्वीकार भएपछि विभिन्न पार्टीहरूको मोर्चा बनाएर सहकार्य गर्नेबारे छलफल भएको हो ।

पछिल्ला केही दिनयता यी नेताहरु निरन्तर छलफलमा छन् । बिहीबार बिहान प्रचण्ड र बाबुरामबीच ललितपुरमा भएको भेटमा समाजवादी केन्द्र निर्माण बारे छलफल भएको छ।

पछिल्लो पटक भएको छलफलमा कम्युनिष्ट विचारधाराको पार्टीमा नरहने बताउँदै आएका डा. भट्टराईले समाजवादी लाइनमा जाने बताएका छन् ।

माधव नेपाल नेतृत्वको एकीकृत समाजवादी र माओवादी केन्द्र समान एजेन्डा लिएर अघि बढेको र समाजवादी केन्द्र बनाउँदा उनीहरूलाई पनि समेट्न सकिने बारेमा प्रचण्ड र भट्टराईबीच छलफल भएको एक नेताले बताए। डा. भट्टराई नयाँ पार्टी दर्ताको प्रक्रियामा छन् ।