११ महीनामा १६ अर्बको फलफूल आयात

भन्सार विभागले हालै सार्वजनिक गरेको चालु आर्थिक वर्षका ११ महीनामा १६ अर्ब रुपैयाँ बढीको कृषि तथा फलफूल आयात भएको पाइएको छ।

११ महीनामा १६ अर्बको फलफूल आयात

काठमाडौं। देशको परिचय कृषि प्रधान। खेतीपाती गर्ने जमिन बाँझो। खेती गर्ने युवाजति खाडीमा। तिनै युवाले पठाएको विप्रेषणको पैसा खर्च गरेर विदेशबाट खाद्यान्नको आयात गर्नु परिरहेको डरलाग्दो तथ्यांक सार्वजनिक भएको छ।

भन्सार विभागले हालै सार्वजनिक गरेको चालु आर्थिक वर्षका ११ महीनामा १६ अर्ब रुपैयाँ  बढीको कृषि तथा फलफूल आयात भएको पाइएको छ। मुलुकका दुई तिहाइभन्दा बढी जनता कृषिमा आश्रित रहेका र कूल गार्हस्थ्य उत्पादन (जिडिपी) मा कृषि क्षेत्रको योगदान एक तिहाइभन्दा बढी रहेको अवस्थामा समेत फलफूको आयातमा अर्बौं रकम बाहिरिरहेको छ।

चालु आर्थिक वर्षको पहिलो ११ महीनामा फलफूलको आयातका कारण १६ अर्ब २१ करोडभन्दा धेरै रकम विदेशिएको भन्सार विभागले सार्वजनिक गरेको तथ्यांकमा उल्लेख छ।

मुलुकको आर्थिक क्षेत्रमा कृषिको योगदान उल्लेख्य रहे पनि अझै कूल कृषियोग्य जमिनमध्ये धेरै बाँझो छ। यस्ता कृषियोग्य भूभागको थोरै मात्राको सही र व्यवस्थित उपयोग गर्नसके कृषिजन्य उपभोग्य वस्तुमा आत्मनिर्भर हुने अवस्था ल्याउन सकिन्छ। यस्ता उपभोग्य वस्तु आयात गरी अर्बौँ रकम विदेशिनबाट जोगिन सक्ने देखिएको छ।

भन्सार विभागले चालु आर्थिक वर्षको जेठ मसान्तसम्मको आयात तथा निर्यातको अवस्थाबारेमा सार्वजनिक गरेको विवरणानुसार मुलुकले फलफूलका साथै दैनिक उपभोग्य वस्तुको आयातबाट अर्बौं रकम बाहिर पठाएको देखिन्छ भने नेपालमै उत्पादन गर्न सकिने कृषिउपजसमेत अत्यधिक आयात भइरहेको देखिन्छ।

चालू आर्थिक वर्षको समीक्षा अवधिमा मुलुकमा १६ अर्ब २१ करोडभन्दा बढी रकम ताजा तथा सुकेका फलफूल आयातमा बाहिरिएकोे विभागले सार्वजनिक गरेको विवरणमा उल्लेख छ।

६ अर्ब ६५ करोडको स्याउ आयात

विभागका अनुसार चालू आर्थिक वर्षको जेठ मसान्तसम्म छ अर्ब ६५ करोड ११ लाख ९९ हजार मूल्य बराबरको आठ करोड १५ लाख ३८ हजार ४२६ किलो स्याउ आयात भएको छ। त्यसबाट सरकारले ६३ करोड ५८ लाख ७८ हजार बराबरको राजस्वसमेत संकलन गरेको छ।

स्याउ चीनबाट सबैभन्दा धेरै भित्रिएको तथ्यांकमा उल्लेख छ। चीनबाट मात्र पाँच अर्ब ४८ करोड ८० लाख १७ हजार बराबरको स्याउ आयात भएको छ। त्यस्तै भारतबाट एक अर्ब १५ करोड ५९ लाख ८३ हजार, अमेरिकाबाट ४४ लाख १३ हजार, टर्कीबाट २६ लाख २५ हजार र गिनी बिसाउबाट एक लाख ६१ हजार बराबरको स्याउ आयात भएको विवरणमा उल्लेख छ।

दुई अर्ब बढीको अङ्गुर आयात

चालु आवको जेठ मसान्तसम्म दुई अर्ब १९ करोड ५३ लाख ३५ हजारको तीन करोड २१ लाख ३१ हजार ७९२ किलो अङ्गुर आयात भएको देखिन्छ। त्यसबाट सरकारले ११ करोड ११ लाख ७४ हजार राजस्व सङ्कलन गरेको जनाइएको छ।

एक अर्ब ५७ करोडको केरा आयात

नेपालीले ११ महीनाको अवधिमा एक अर्ब ५७ करोड ४७ लाख ५३ हजार बराबरको केरा आयात गरेको छ। चालु आवको जेठ मसान्तसम्म कूल छ करोड २१ लाख ६३ हजार ९८८ किलो केरा आयात भएको छ। त्यसबाट सरकारले १९ करोड १२ लाख तीन हजार राजस्व संकलन गरेको छ।

विभागको विवरणानुसार सुन्तलाको आयात पनि उस्तै छ। एघार महीनाको अवधिमा मात्रै एक अर्ब २४ करोड ८६ लाख २१ हजार बराबरको दुई करोड २८ लाख चार हजार १७३ किलो सुन्तला आयात भएको छ।

त्यस्तै जेठ मसान्तसम्म एक करोड चार लाख ८४ हजार १०१ किलो अनार आयात भएको छ। त्यसका लागि एक अर्ब नौ करोड तीन लाख ९८ हजार रकम बाहिरिएको छ। यस्तै खरबुजा एक करोड ९७ लाख ३९ हजार २७७ किलो आयात भएको छ। खरबुजाको आयात मूल्य ५१ करोड ३१ लाख ९१ हजार बराबर छ।

नेपालको हावापानी सुहाउँदो फलका रुपमा रहेको मेवाको आयातसमेत उच्च देखिन्छ। विभागका अनुसार चालु आर्थिक वर्षको ११ महीनामा ६६ लाख ४४ हजार १६१ किलो मेवा आयात भएको देखिन्छ। मेवाको आयात मूल्य २३ करोड ४० लाख दुई हजार बराबर छ।

यस अवधिमा २१ लाख ९४ हजार १९९ किलो नास्पाती १५ करोड आठ लाख ३९ हजार बराबरको आयात भएको छ भने २६ लाख ८५ हजार ६९१ किलो भुँइकटहर (ताजा र सुकेका) १२ करोड चार लाख ६२ हजारको आयात भएको छ। अम्बा र आँप ७१ करोड ७५ लाख ९४ हजार बराबरको आयात भएको देखिन्छ।

दुई लाख ४५ हजार ८६९ किलो एभोगाडो छ करोड ९१ लाख बराबरको आयात भएको छ भने व्यावसायिकरुपमा मुलुकमै खेती गरिने किबी छ करोड २२ लाख ६९ हजार बराबर मूल्यमा तीन लाख ३५ हजार ५४७ किलो आयात भएको छ।

चालु आवको समीक्षा अवधिमा नौ लाख ९१ हजार २२८ किलो लिची तीन करोड ८७ लाख ६६ हजार मूल्यमा आयात भएको छ। अन्य ताजा तथा सुकेका फलफूल करोडौँ मूल्यमा आयात भएको विभागले सार्वजनिक विवरणमा उल्लेख छ।


Comment

Leave a Reply

Your email address will not be published. Required fields are marked *

थप समाचार

लोकप्रिय (यो साता)

Copyright © 2024 Digital House Nepal Pvt. Ltd. - All rights reserved