प्रेम आलेसहित ६ नेताले लिए हस्ताक्षर फिर्ता, झाँक्रीसहितका चार नेताले लिएनन्

काठमाडौं। संसदीय दलको बैठक बोलाउन माग गर्दै लिखित निवेदन दिने नेकपा एकीकृत समाजवादीका ६ नेताले हस्ताक्षर फिर्ता लिएका छन्।

शनिबार काठमाडौंमा बसेको समाजवादीको केन्द्रीय कमिटी बैठकका क्रममा पर्यटनमन्त्री प्रेम आलेलगायत ६ जनाले आफूहरू भ्रममा परेर यसअघि हस्ताक्षर गरेको भन्दै अहिले हस्ताक्षर फिर्ता लिएको लिखित जानकारी गराएका हुन्। हस्ताक्षर फिर्ता लिनेमा आलेसहित धनबहादुर बुढा, कृष्णलाल महर्जन, गोपालबहादुर बम, पुष्पाकुमारी कर्ण कायस्थ र बिनादेवी बुढाथोकी रहेको नेकपा समाजवादीका नेता सोमप्रसाद पाण्डेले जानकारी दिए।

यसअघि निवेदन दिनेमध्ये स्वास्थ्यमन्त्री विरोध खतिवडा, शहरी विकासमन्त्री रामकुमारी झाँक्री, श्रम रोजगार तथा सामाजिक सुरक्षामन्त्री कृष्णकुमार श्रेष्ठ र सासंद निरा जैरुले भने हस्ताक्षर फिर्ता गरेका छैनन। मन्त्री फेर्ने प्रस्तावमा असन्तुष्टि जनाउँदै समाजवादीका १० सांसदले अध्यक्ष माधवकुमार नेपालसमक्ष संसदीय दलको बैठक बोलाउन माग गर्दै निवेदन दिएका थिए।