गल्याङ नगरपालिकाले घरमै पुगेर वृद्धभत्ता दिने

स्याङ्जा। गल्याङ नगरपालिकाले वृद्ध भत्ता अब घर–घरमै पुगेर वितरण गर्ने भएको छ। पालिकाका विभिन्न वडामा रहेका वृद्धवृद्धाहरूलाई गल्याङ बजारसम्म आउनुपर्दा समस्या हुने र लाइन बस्नुपर्दा सास्ती भएको भन्दै घर घरमै पुगेर वितरण गर्ने निर्णय गरेको हो।

नगरस्थित बैंक तथा वित्तीय संस्थाहरूको संयुक्त बैठकले नगरपालिकाका कर्मचारी र बैंकका कर्मचारीको संयुक्त पहलमा घर–घरमै पुगेर वितरण गर्ने तयारी गरिएको नगरप्रमुख गुरुप्रसाद भट्टराईले बताए।

“वृद्ध भत्ता बुझ्न गाउँगाउँबाट बजारमा रहेका बैंकमा आउँदा वृद्धवृद्धालाई झनै सास्ती भएको गुनासो आउने थालेपछि बैंकका कर्मचारी र नगरपालिकाका कर्मचारीहरू नै घर-घरमा पुगेर वितरण गर्ने तयारी गरेका हौँ”, उनले भने।

नेपाली कांग्रेसबाट विजयी भएका प्रमुख भट्टराईले आफ्नो चुनावी घोषणापत्रमा घर-घरमै वृद्धभत्ता दिने उल्लेख गरेका थिए। घोषणापत्रमा उल्लेख गरेबमोजिम नै बैंक तथा वित्तीय संस्थाहरूको समन्वय र सहकार्यमा कार्यान्वयनमा अगाडि बढेको उनले बताए।

त्यस्तै पुतलीबजार नगरपालिकाले पनि वृद्धवृद्धालाई बैंकसम्म आएर वृद्ध भत्ता बुझ्नुपर्दा समस्या भएको भन्दै घरमै पुगेर वितरण गर्ने तयारी थालेको छ। ग्रामीण भेगदेखि बजारमा रहेको बैंकसम्म आउँदा जाँदा सवारीसाधनको समस्या र बैंकमा आएर लामो समय लाइनमा बस्नुपर्ने अवस्थाको अन्त्यका लागि घरमै पुगेर वितरण गर्ने तयारी गरेको नगरप्रमुख तुल्सीराम रेग्मीले बताए।

घरमै पुगेर वितरण गरेपछि समय र खर्चमा पनि वचत हुनाका साथै सहज हुने भएकाले घरबाटै वितरण गर्ने तयारी थालिएको उनले जानकारी दिए।