विराटनगरमा कांग्रेसको विरासत जोगाउने नागेश कोइरालाको यस्तो छ राजनीतिक यात्रा

विराटनगर। विराटनगर महानगरपालिकाको मेयरमा सत्ता गठबन्धनबाट नेपाली कांग्रेसका उम्मेदवार नागेश कोइराला निर्वाचित भएका छन्। निकटतम प्रतिस्पर्धी नेकपा एमालेका सागर थापालाई ८ हजार ७१५ मतान्तरले पराजित गर्दै कोइराला विराटनगरको मेयरमा निर्वाचित भएका हुन्।

एमाले उम्मेदवार थापाले २१ हजार ४५५ मत ल्याउँदा कोइरालाले ३० हजार १७० मत प्राप्त गरेका हुन्। विराटनगरमा कुल ८९ हजार ७८९ मत खस्दा कोइरालाले मतगणनाको शुरुआतदेखि नै अग्रता कायम गर्दै आएका थिए।

तरुणदलदेखि मेयरसम्मको नागेशको यात्रा

विराटनगर महानगरपालिको मेयरमा निर्वाचित भएका नागेश कोइराला राजनीतिक परिवारका सदस्य हुन्। उनको जन्म ३१ असार २०३० मा भएको हो। उनी ऋषिकेश कोइरालाका नाति उमेश कोइरालाका छोरा हुन्।

बीपी र गिरिजाप्रसाद कोइराला परिवारभित्रकै नभए पनि उनीहरु १० दिने दाजुभाइ हुन्। नेपाली कांग्रेसका वरिष्ठ नेता शेखर कोइराला र नागेशबीच काका–भतिजको सम्बन्ध छ।

नागेश अस्ट्रेलियामा पढेर नेपाल फर्किएका हुन्। कांग्रेसको भ्रातृ सङ्गठन तरुण दलको कोषाध्यक्ष भएपछि उनी सक्रिय राजनीतिमा आएका हुन्।

तरुण दलपछि उनी कांग्रेसको जिल्ला सचिव भए। अहिले उनी मोरङ कांग्रेसका उपसभापति छन्।

चुनावअघि कांग्रेसबाट विराटनगर महानगरमा कसलाई उम्मेदवार बनाउने भन्ने विषयमा लामो विवाद भएको थियो। विवादबीच शेखरले सभापति शेरबहादुर देउवासँग कुनै हालतमा नागेशले टिकट पाउनुपर्ने अड्डी कसेका थिए। शेखरकै अड्डीबीच डिला संग्रौला र अमृत अर्यालसहितका चर्चित नेताहरुलाई पछि पार्दै नागेश मेयरको दौडमा निस्किएका हुन्।

विराटगरको विकासमा ध्यान दिनेछु : नवनिर्वाचित मेयर कोइराला

विराटनगर महानगरपालिको मेयरमा विजयी भएपछि सञ्चारकर्मीहरूसँग कुराकानी गर्दै नागेश कोइरालाले विराटनगरबासीले चाहेजस्तो विकासको काम गरेर अगाडि बढ्ने बताएका छन्। शिक्षा, स्वास्थ्य र सरसफाइ आफ्नो प्रमुख प्राथमिकतामा रहने उनले बताए। घोषणापत्र अनुसार काम गरेर देखाउने उनले प्रतिबद्धता व्यक्त गरे।

मेयर पदमा निर्वाचित भएपछि उनले सबैलाई करको दायरामा ल्याउँदै समय सापेक्ष कर निर्धारण गर्ने बताए। “व्यापार व्यवसायमा अहिले बढेको कर घटाउनेछु,” उनले भने, “करको दायरा बढानउेछु।”

कोइरालाले आफ्नो कार्यकालमा विराटनगरलाई सफा, सुन्दर र सुरक्षित शहर बनाउने घोषणा गरे। भने, “नगरबासीहरूको हकहितको लागि विशेष काम गर्छु। बालबालिकाको लागि विभिन्न कार्यक्रम र बेरोजगार युवाहरूको लागि क्षमताको आधारमा कार्यक्रम ल्याउँछु।”