क्षीरेश्वरनाथमा तीन दिनदेखि रोकिएको मतगणना शुरु, वडा नम्बर पाँचमा कांग्रेस विजयी

जनकपुरधाम। तीनदेखि रोकिएको धनुषाको क्षीरेश्वरनाथ नगरपालिकाको मतगणना शुरु भएको छ। गएराति ११ बजेदेखि मतगणना शुरु भएपछि वडा नं. ५ मा नेपाली काङ्ग्रेसका उम्मेदवार जिवछ मण्डल ६ मतले विजयी भएका छन्।

सोही वडामा मतपरिणामको विषयमा बिबाद हुँदा पुनः गणना गरिएको थियो। उक्त गणनाबाट मण्डल ६ मतले दोश्रो कार्यकालका लागि प्यानलसहित विजयी भएका हुन्।

यसअघि भएको मतगणनामा मण्डलले नै २ मतले जितेको नतिजा आएको थियो। तर, नेकपा एमालेले १ मतले आफ्नो उम्मेदवार राज नारायण प्रसाद गुप्ता (राजु)ले जितेको दाबी गर्दै पुनः मतगणनाको माग गरेपछि मतगणना अवरुद्ध भएको थियो।

एमालेले मतगणनामा धाँधली भएको आरोप लगाउदै पुनः मतगणना हुनुपर्ने माग राख्दा ३ दिन मतगणना अवरुद्घ भएको थियोे। पुनः मतगणनाबाट मण्डल ९१२ मत ल्याएर विजयी हुँदा निकटतम प्रतिद्वन्द्वी एमालेका राजु गुप्ताले ९०६ मत प्राप्त गरे।

वडा नं ५ बाट कांग्रेसका मेयरका उम्मेदवार योगेन्द्र पजियारले १ हजार १८७ मत प्राप्त गरेका छन् भने एमालेका मेयर उम्मेदवार सुखदेव यादवले १ हजार ११५ मत प्राप्त गरेका छन्।

त्यस्तै, कांग्रेसका उपमेयर रचना माथेमाले १ हजार २१९ र एमालेका उपमेयर सालिनी चौधरीले १ हजार २४ मत प्राप्त गरेका छन्। अब वडा नं १ को मतगणना शुरू भएको छ।