मातातीर्थमा श्रद्धालुको भीड (फोटो फिचर)

काठमाडौं। आज वैशाखकृष्ण पक्ष औँसी अर्थात आमाको मुख हेर्ने दिन। आजको दिनमा आफूलाई जन्म दिने आमालाई सम्मान गरी मीठामीठा खानेकुरा खान दिई श्रद्धा भक्तिसाथ मनाइँदैछ।

आज चन्द्रागिरि नगरपालिकास्थित मातातीर्थमा भव्य मेला लागेको छ। आमा नभएकाहरुले उक्त मातातीर्थमा गएर आमाको सम्झानामा पूजा र दान दक्षिणा गर्ने गर्दछन्।

कोराना महामारीका कारण पछिल्लो दुई वर्ष उक्त मेला रोकिए पनि आज भने लागेको छ।

आजको दिनमा छोराछोरीले बिहानै उठेर नुहाएर आफ्नी आमालाई राम्राराम्रा लुगा लगाइदिने तथा मीठा र तागतिला खानेकुरा खुवाउने गर्दछन्। भक्तिभावसहित आमाको आशीर्वाद थाप्ने चलन रहेको छ।

शास्त्रमा आमालाई पण्डित, आचार्य र पिताभन्दा पनि ठूली मानिएको छ। आजको दिनलाई आमाप्रति श्रद्धा, भक्ति, सम्मान र आदर गर्ने तथा आशीश थाप्ने दिनका रूपमा लिइँदै आएको परम्परा छ।