महोत्तरीमा ६ वर्षीया बालिकामाथि बलात्कार

महोत्तरी। महोत्तरीमा ६ वर्षीया बालिकामाथि बलात्कार भएको छ। बालिकाको स्वास्थ्य अवस्था बिग्रिएको छ। विपन्न परिवारको भएको हुँदा पैसाको अभावमा उपचार गराउनसमेत सकेका छैनन्।

पीडित परिवार दोलाठीस्थित आरबी इट्टा भट्टामा मजदुरी गर्दै आएका थिए। उक्त दम्पत्तीकी ६ वर्षीया छोरी गत १२ चैतमा मकवानपुर घर भई दोलाठी बस्ने २० वर्षीय राजेश लामाले बलात्कृत भएकी थिइन्। पीडित परिवारले चैत १६ गते मात्र घटनाका बारेमा बालिकाले बताएपछि थाहा पाएको पीडितका बुवाले बताए। पीडित बालिकालाई आमाले नुहाउन लाग्दा योनीमा दुःखेको बताएपछि घटना बारे थाहा पाएर प्रहरीलाई खबर गरेको थियो।

घटनाको जानकारीपछि २६ चैतमा राष्ट्रिय महिला आयोगका अध्यक्ष कमला पराजुली र अनौपचारिक क्षेत्र सेवा केन्द्र (इन्सेक) मधेश प्रदेश संयोजक राजु पासवान नेतृत्वको टोलीले स्थलगत अध्ययन गरी घटनाको बारेमा जानकारी लिएका छन्।

आरोपित विरुद्ध १६ चैतमा जिल्ला प्रहरी कार्यालय महोत्तरीमा उजुरी परेपछि १७ चैत साँझ आरोपितलाई पक्राउ गरिएको महोत्तरीका प्रहरी प्रमुख एसपी कृष्ण प्रसाद पँगेनीले बताए। उनले घटनालाई अनुसन्धान भइरहेको जनाए।

पीडित परिवारजनले बालिकाको स्वास्थ्य उपचारका लागि चैत २५ गते एकद्वार संकट व्यवस्थापन केन्द्र (ओसिएमसी) जलेश्वरमा गएको तर ओसीएमसी बन्द रहेको हुँदा अस्पतालमा जाँदा औषधि खरिद गर्न भनेपछि आफूसँग औषधी खरिद गर्ने पैसा नभएर फर्किएको अनुगमन टोलीलाई बताए। पीडित बालिकाको योनिमा घाउँसमेत भई पानी बग्ने गरेकोले उपचारका लागि सहयोग लागि पीडित परिवारले अनुरोध गरे पछि इन्सेक मधेश प्रदेश कार्यालयले ५ हजार रुपैयाँ उपचारको लागि सहयोग गरेको इन्सेक मधेस प्रदेश संयोजक राजु पासवानले बताए।

आरोपित पक्षले अहिले दोषीलाई छुटाउन दबाब दिइरहेको पीडित बालिकाका बुबाले बताए।