हेटौँडा उपमहानगरले गर्‍यो १२ प्रतिशत बजेट खर्च, २४ प्रतिशत योजना सम्झौता

हेटौँडा। हेटौँडा उपमहानगरपालिकाले चालु आर्थिक वर्षको सात महीना बितिसक्दा जम्मा २४ प्रतिशत योजना सम्झौता गरेको छ।

उपमहानगरपालिकाको एक हजार २३७ ओटा योजनामध्ये २४ दशमलव १७ प्रतिशत अर्थात २९९ ओटा मात्रै योजना सम्झौता गरेको हो। अझै ९३८ ओटा योजनाहरु सम्झौता हुन बाँकी रहेका उपमहानगरपालिकाको योजना महाशाखाले जनाएको छ।

१० लाखभन्दा तलका योजनाहरु सम्बन्धित वडा कार्यालयले नै सम्झौता गर्ने हुँदा यकिन तथ्याङ्कमा समस्या भएको योजना शाखाका किरण थापाले बताए। चालु आर्थिक वर्षको पहिलो त्रैमासिकमा २०६ ओटा योजना सम्झौता गरेको उपमहानगरपालिकाले पछिल्लो चार महीनामा जम्मा ९३ ओटा मात्रै योजना सम्झौता गरेको हो।

उपमहानगरपालिकाको ठेक्कामार्फत नौ ओटा योजना भएकोमा ६ ओटा योजनाको सम्झौता भएर निर्माण कार्यसमेत भइरहेको छ।

दुई ओटा योजना बोलपत्र मुल्याङ्कनको चरणमा रहेको छ भने एउटा योजनामा कुनै पनि ठेक्का नपरेको शहरी पूर्वाधार महाशाखा प्रमुख सत्यनारायण शाहले जानकारी दिए। नौ ओटा योजनामध्ये सात ओटा आन्तरिक श्रोतबाट र दुई ओटा योजना बागमती प्रदेश सरकारसँग समपूरक लगानीमा रहेका उनले बताए।

हेटौँडा–४ हुप्रचौरमा १० लाख बराबरको झण्डा निर्माण कार्यमा कुनै पनि ठेक्का नपरेको शाहले बताए। हेटौँडा उपमहानगरपालिका वडा नम्बर ७ मा वडा कार्यालयको भवन निर्माणको लागि श्री सर्वेश्वर निर्माण सेवा, काभ्रेसँग ठेक्का सम्झौता गरेर निर्माण कार्य अघि बढाइएको शाहले बताए।

एक करोड १ लाख लागत अनुमान गरिएको उक्त भवनको निर्माण कार्यको लागि घटिघटाउका आधारमा ५१ लाख ६७ हजार ५०७ मा सम्झौता गरिएको हो। त्यसैगरी एक्लेखेत राजदेवी सडक स्तरोन्नतिका लागि स्वच्छन्द निर्माण सेवासँग एक करोड ८९ लाखमा सम्झौता गरिएको छ।

दुई करोड ९३ लाख ४५ हजार लागत अनुमान गरिएको कठायत चोकदेखि बालबोध माविसम्मको सडक स्तरोन्नतिका लागि पनि स्वच्छन्द निर्माण सेवासँग नै एक करोड ७६ लाख रुपैयाँमा सम्झौता गरेको छ।

त्यसैगरी हेटौँडा ८ मा कालिका मार्ग सडक स्तरीकरण, हेटौँडा ९ को मदन मार्ग सडक स्तरीकरण र हेटौँडा ७ मा रहेका विभिन्न सडकहरुको स्तरीकरणको लागि ठेक्का सम्झौता भएर निर्माण कार्य अघि बढेको महाशाखा प्रमुख शाहले जानकारी दिए।

हटिया पशुसेवा केन्द्र भवनको पहिलो चरणको निर्माणको लागि पनि ठेक्का सम्झौता भइसकेकोको उपमहानगरपालिकाले जनाएको छ।

१२ प्रतिशत खर्च
हेटौँडा उपमहानगरपालिकाले चालू आर्थिक वर्षको दोस्रो त्रैमासिकमा १२ प्रतिशत बजेट खर्च गरेको छ। उपमहानगरपालिकाको कुल बजेट दुई अर्ब ८६ करोड ५५ लाख २३ हजार रुपैयाँ रहेकोमा १२ दशमलव ८१ प्रतिशत अर्थात ३६ करोड ७२ लाख ५८ हजार १०९ रुपैयाँ खर्च भएको उपमहानगरपालिकाको सूचना अधिकारी भानुभक्त थपलियाले जानकारी दिए।

चालू पुँजीअन्तर्गत एक अर्ब २६ करोड ७१ लाख ८० हजार १३९ रुपैयाँ रहेकोमा १५ करोड ७० लाख ७६ हजार ३८८ रुपैयाँ खर्च भएको छ। त्यसैगरी पुँजीगत तर्फ १ अर्ब ५९ करोड २३ लाख ४२ हजार ८६१ रुपैयाँ रहेको थियो। जसमध्ये चालु आर्थिक वर्षको ६ महीनामा २० करोड ७८ लाख ३६ हजार ६२९ रुपैयाँ खर्च भएको थपलियाले बताए।

१५ करोड राजश्व संकलन
हेटौँडा उपमहानगरपालिकाले चालु आर्थिक वर्षको ६ महीनामा १५ करोड ३१ लाख ५१ हजार ३६ रुपैयाँ राजश्व संकलन गरेको छ।

उपमहानगरपालिकाले चालु आर्थिक वर्षको पहिलो त्रैमासिकमा आठ करोड ४५ लाख ९६ हजार ३४४ रुपैयाँ राजश्व संकलन गरेको थियो भने दोस्रो त्रैमासिकमा ६ करोड ८५ लाख ५४ हजार ६९१ रुपैयाँ राजश्व संकलन गरेको छ।

चालु आर्थिक वर्षको दोस्रो त्रैमासिकमा उपमहानगरपालिकाले सबैभन्दा बढी सम्पत्ति करमार्फत एक करोड २१ लाख २५ हजार ४६६ रुपैयाँ राजश्व संकलन गरेको हो।