सिन्धुपाल्चोक। इन्द्रावती गाउँपालिकाको रणनीतिक सडकअन्तर्गत ज्यामीरेमाने-नवलपुर सडकको स्तरोन्नति कार्यको शिलान्यास भएको छ। इन्द्रावती गाउँपालिकाका अध्यक्ष वंशलाल तामाङले मङ्गलबार सो सडकको शिलान्यास गरेका हुन्।
शिलान्यासको अवसरमा अध्यक्ष तामाङले इन्द्रावती समृद्धिको आधार, शिक्षा, कृषि, स्वास्थ्य, पर्यटन र पूर्वाधार भन्ने गाउँपालिकाको नारालाई सार्थक बनाउन यो सडकले सहयोग गर्ने जानकारी दिए। उनले गाउँपालिकाका सम्पूर्ण सडक क्रमशः स्तरोन्नति र कालोपत्र गरिँदै लैजाने जानकारी दिँदै धमाधम काम भइरहेको उल्लेख गरे।
सङ्घीय सरकार र स्थानीय सरकारको साझेदारीमा सो काम सुरु गरिएको हो। सो सडकको स्तरोन्नति पश्चात गाउँपालिकाको ७ वटा वडाले प्रत्यक्ष रुपमा लाभ लिनेछन्। सडक र नाला निर्माणपछि त्यस क्षेत्रमा आवतजावत सहज हुने बताइएको छ। सडकको स्तरोन्नतिका लागि मूल्य अभिवृिद्ध करसहित १० करोड ९ लाख ९ हजार ८५१ रुपैयाँ लागत अनुमान छ।
सो लागतमा इन्द्रावती गाउँपालिकाको पाँच करोड ९४ लाख ९ हजार ८५१ र सङ्घीय सरकारको समपुरक अनुदान चार करोड १५ लाख रहेको छ। ज्यामीरेमाने नवलपुर सडक स्तरोन्नतिमा बाटो चौडा गर्ने, प्लम क्रङक्रिटको नाली बनाउने, ढुङ्गाको सोलिङ, गाभ्रेल, स्टोन मेसिनरी तथा ग्याबिन वाल लगाउने, ह्युमपाइप हाल्ने र बाटो ढलानको काम रहेको छ।
सो बाटो निर्माणका लागि श्री घिसिङ-युएण्डएस जेभी, माझिफेदा काभ्रेले सम्झौता गरेर काम शुरु गरेको छ। निर्माणको जिम्मा पाएको कम्पनीले पाँच करोड २१ लाख २३ हजार ३५४ मा ठेक्का सम्झौता गरेको छ। गाउँपालिकाका प्रमुख प्रसाशकीय अधिकृत रामप्रसाद शर्माले गाउँपालिकाद्वारा भएका महत्वपूर्ण कार्यक्रम र हालसम्म हासिल गरेका मुख्यमुख्य उपलब्धिमध्ये यो सडक पनि रहेको जानकारी दिए। सडक स्तरोन्नति भएपछि दुर्घटनामा कमी आउने अपेक्षा गरिएको छ।
Facebook Comment
Comment