तीन महीना पूरा भएका गर्भवतीलाई मन्त्रालयको अनुरोध, ‘कोरोना खोप लगाउनुस्’

काठमाडौं। स्वास्थ्य तथा जनसंख्या मन्त्रालयले तीन महिना पूरा भएका गर्भवतीलाई कोरोना भाइरस (कोभिड १९) विरुद्धको खोप लगाउन अनुरोध गरेको छ।

पहिलो तीन महीना कटिसकेका सबै गर्भवती महिलाहरुलाई नजिकैको खोप केन्द्रमा गएर खोप लगाउन मन्त्रालयले अनुरोध गरेको हो।

स्वास्थ्य सेवा विभाग, परिवार कल्याण महाशाखाका निर्देशक डा. विवेककुमार लालले गर्भवती महिलाले नजिकैको खोप केन्द्रमा गएर सहज रुपमा खोप लगाउन सक्ने बताए।

उनी भन्छन्, ‘‘नेपाल सरकारले खोप सम्बन्धमा थप अर्को निर्णय गर्दै गर्भवती महिलाको गर्भ तीन महीना कटिसकेको छ भने कोभिडविरुद्धको खोप लगाएर आफूलाई सुरक्षित बनाउन अनुरोध गरेका छौं।”

डा. लालले गर्भवती महिलाले नेपालमा उपलब्ध खोपमध्ये एस्ट्राजेनेका, कोभिसिल्ड र भेरोसेल जुन खोप लगाए पनि हुने बताए।

नेपालमा २३ मंसीरसम्म कुल जनसंख्याको ३६ प्रतिशतले पहिलोमात्रा खोप लगाएका छन् भने दास्रो मात्रा ३० प्रतिशतले लगाएको स्वास्थ्य मन्त्रालयले जनाएको छ।