विवाह पञ्चमी महोत्सव : आज मटकोर विधि, भोलि विवाह महोत्सव

जनकपुरधाम। जनकपुरधाममा मनाइने सप्ताहव्यापी रामजानकी विवाहपञ्चमी महोत्सव अन्तर्गत आज पाचौं दिन मटकोर विधि मनाइँदै छ।
जनकपुरको धार्मिक तथा ऐतिहासिक गंगासागरमा पुगेर आज दिउँसो मिथिलाको परम्परा अनुसार राम र जानकीको मटकोर गर्ने कार्यक्रम रहेको छ।

मटकोरमा प्रसादको रुपमा भिजाइएको चना, चामल र खाने तेल वितरण हेर्न जाने श्रद्धालुलाई वितरण गर्ने गरिन्छ। विवाहको शुद्धिकरणका लागि मटकोर गर्ने परम्परा छ।

आज मटकोर सकिएपछि भोली बुधबार भगवान् श्रीराम र जानकीको डोला फेर गरी स्वयंम्बर र विवाह महोत्सव हुने छ।

सप्ताहव्यापी सीताराम विवाहपञ्चमीको पहिलो दिन शुक्रबार नगर दर्शन, दोश्रो दिन फुलबारी लिला, तेश्रो दिन धनुष यज्ञ र चौथो दिन (सोमबार) तिल्कोत्सव सम्पन्न भइसकेको छ।

आज मटकोर, भोली बुधवार विवाह र विहिवार राम कलेवा मनाएपछि विवाहपञ्चमी महोत्सव विधिवत् समापन हुने जानकी मन्दिरका महन्त रामतपेश्वर दासले जानकारी दिए। त्रेता युगमा भगवान राम र आदर्श नारी सीताबीच विवाह भएको स्मरणमा जनकपुरमा प्रत्येक वर्ष सप्ताहव्यापी रुपमा धुमधामसँग विवाहपञ्चमी महोत्सव मनाउने गरिन्छ।