एक वर्षभित्र निर्वाचन हुने र एमालेले सरकार बनाउने ओलीको दाबी

काठमाडौं। एमाले अध्यक्ष केपी ओलीले ढिलोमा एक वर्षभित्र मुलुकमा निर्वाचन हुने र त्यसपछि एमालेले सरकार बनाउने दाबी गरेका छन्। काठमाडौंमा शनिबार आयोजित कार्यक्रममा ओलीले एमाले नेतृत्वको सरकार बनेपछि मुलुकमा पुनर्निर्माण र नवर्निर्माणको काम तीव्रताका साथ अघि बढाउने आश्वासनसमेत दिए।

पूर्वप्रधानमन्त्रीसमेत रहेका ओलीले सम्पदाहरूको पुनर्निर्माण, राजमार्गलगायतका पूर्वाधारको निर्माण कार्य देख्न नसक्नेहरूले आफूलाई सरकारबाट हटाएको जिकिर गरे।

उनले अब मुलुकको विकास र समृद्धिको अभियानलाई निरन्तरता दिन एमालेलाई आगामी निर्वाचनमा विजयी गराउनुपर्ने पनि बताए।

उनले भने, ‘‘एक वर्षमा चुनाव हुनैपर्छ। चुनाव भएपछि मैले भनिरहनु पर्लाजस्तो लाग्दैन–अब कसको सरकार बन्छ देशमा ? त्यसो भएर एक वर्ष पर्खनुपर्ने हो । त्यसपछि हामी पुनर्निर्माण र नवनिर्माणको कामहरू अगाडि बढाउँछौँ । र, देशलाई समृद्धिको बाटोमा लान्छौँ।