बृहत् लुम्बिनी गुरुयोजनाका बाँकी काम तत्काल अघि बढाऔँः पूर्वअर्थमन्त्री पौडेल

केन्जो टांगेले ४० वर्षअघि बनाएको लुम्बिनी गुरुयोजना अझै पूरा नहुनु बिडम्बना भएको बताउँदै यसको शीघ्र कार्यान्वयन आवश्यक रहेकामा पौडेलले जोड दिए। पूर्वमन्त्री पौडेलले गुरुयोजनाको कार्यान्वयनले मात्रै लुम्बिनी आकर्षक पर्यटकीय गन्तव्यका रूपमा स्थापित हुने बताए।

नेपाल भ्यूज

बृहत् लुम्बिनी गुरुयोजनाका बाँकी काम तत्काल अघि बढाऔँः पूर्वअर्थमन्त्री पौडेल

रुपन्देही। नेकपा (एमाले)का उपाध्यक्ष तथा पूर्वअर्थमन्त्री विष्णुप्रसाद पौडेलले बृहत् लुम्बिनी गुरुयोजनाको कार्यान्वयनले देशको समृद्धि र अर्थतन्त्रमा योगदान दिनसक्ने भन्दै यसका बाँकी काम तीव्ररूपमा अघि बढाउन नेपाल सरकार र सरोकारवाला व्यक्तिहरूको ध्यानाकर्षण गराएका छन्।

लुम्बिनी बौद्ध विश्वविद्यालयको १७ औँ स्थापना दिवसको कार्यक्रममा बोल्ने क्रममा पौडेलले धार्मिक र पर्यटकीय हिसाबले विश्वकै आकर्षक गन्तव्यका रूपमा विकास भइरहेको लुम्बिनीको थप विकासका लागि बृहत गुरुयोजनाको कार्यान्वयन आवश्यक रहेको सुझाव दिए।

“दुनियाँमा मानिसले ठूला चमत्कार गर्न सक्लान् तर बुद्धको जन्मभूमि कसैले सिर्जना गर्न सक्दैन। धार्मिक र पर्यटकीय हिसाबले लुम्बिनी विश्वकै आकर्षक गन्तव्यमात्र होइन कि विश्वको झण्डै एकतिहाइ जनसंख्याकै आस्थाको केन्द्र हो”, पौडेलले भने, “त्यसैले यसको विकासमा राज्यको ध्यान पुग्नु नितान्त जरुरी छ।”

केन्जो टांगेले ४० वर्षअघि बनाएको लुम्बिनी गुरुयोजना अझै पूरा नहुनु बिडम्बना भएको बताउँदै यसको शीघ्र कार्यान्वयन आवश्यक रहेकामा पौडेलले जोड दिए। पूर्वमन्त्री पौडेलले गुरुयोजनाको कार्यान्वयनले मात्रै लुम्बिनी आकर्षक पर्यटकीय गन्तव्यका रूपमा स्थापित हुने बताए।

लुम्बिनी गुरुयोजनाका बाँकी काम तीन वर्षभित्र सम्पन्न गर्नका लागि आफू अर्थमन्त्री भएका बेला सात अर्ब ३३ करोड रुपैयाँ बजेट विनियोजन गरी बहुवर्षीय स्रोत सुनिश्चितता गरेको जनाउँदै यसको सही सदुपयोग गर्न र आयोजनाको पूर्णतामा ढिला नगर्न पनि उनले सरकारसँग आग्रह गरे।

पूर्वमन्त्री पौडेलले गौतमबुद्धले २९ वर्ष बिताएको तिलौराकोट, बुद्धका अस्तु धातु राखिएको ठाउँ रामग्रामलगायतका बुद्धसँग जोडिएका स्थलहरूलाई समेटेर बृहत् लुम्बिनी गुरुयोजना निर्माण गरी प्रभावकारी कार्यान्वयन गर्न आवश्यक रहेको बताए।

लुम्बिनी बौद्ध विश्वविद्यालयलाई बहुविषयक विश्वविद्यालयमा स्तरोन्नति गर्न केन्द्रीय क्याम्पसको संरचना विकास र विस्तारका लागि गौतमबुद्धको मावलीस्थल देवदहमा ९२ बिघा जग्गा अधिग्रहण गर्ने निर्णय अघिल्लो सरकारले गरिसकेको जनाउँदै गुणस्तरीय शिक्षा सुनिश्चित गर्ने विश्वविद्यालयका रूपमा यस विश्वविद्यालाई स्थापित गर्नुपर्ने पौडेलको सुझाव थियो।

“यो विश्वविद्यालयलाई अगाडि बढाउन जुन तत्परता लिइएको छ त्यसलाई नयाँ ढङ्गबाट उचाइमा पु¥याउनुपर्छ”, पौडेलले भने, “यो यात्रा अवरोध नहोस् भन्नका लागि सरकारले तदारुकता लिनुपर्दछ, यसका लागि आवश्यक बजेटको प्रबन्ध होस्।”

पूर्वअर्थमन्त्री पौडेलले गौतमबुद्ध अन्तर्राष्ट्रिय विमानस्थललाई शुरुका दिनमा क्षेत्रीयस्तरको विमानस्थलका रूपमा डिजाइन गरिए पनि आवश्यकता महशुस गरी पूर्ण क्षमतामा सञ्चालनका लागि थप जग्गा अधिग्रहण गरिएको जानकारी दिए।

पौडेलले विमानस्थलको दोस्रो चरणको डीपीआरको काम अघि बढाउन पनि आग्रह गरे। उनले विमानस्थलको उद्घाटन हुँदा दोस्रो चरणको कामको शिलान्यास गर्न सक्ने गरी काम अघि बढाउनुपर्नेमा पनि जोड दिए।

Leave a Reply

Your email address will not be published. Required fields are marked *

सम्बन्धित

ट्रेन्डिङ

Copyright © 2022 Digital House Nepal Pvt. Ltd. - All rights reserved