चितुवाको आक्रमणबाट ज्यान गुमाएकी बालिकाको परिवारलाई राहत

चितुवाको आक्रमणबाट ज्यान गुमाएकी बालिकाको परिवारलाई राहत
फाइल फोटो

तनहुँ । चितुवाको आक्रमणबाट ज्यान गुमाएकी तनहुँको बन्दीपुर गाउँपालिका–५ बाहुनभञ्ज्याङकी बालिकाको परिवारलाई राहत प्रदान गरिएको छ। बन्दीपुर गाउँपालिका र डिभिजन वन कार्यालयले किरिया खर्चबापत बालिकाको परिवारलाई एक लाख रुपैयाँ प्रदान गरेको हो।

गत सोमबार साँझ चितुवाको आक्रमणमा परी नौ वर्षीया बालिका स्वीकृति थापाको मृत्यु भएको थियो। गाउँपालिकाका अध्यक्ष पूर्णसिंह थापाले मृतक बालिकाको हजुरबुबालाई बुधबार उक्त रकम हस्तान्तरण गरेका हुन्। दुवै निकायले राहत स्वरुप तत्कालका लागि ५०/५० हजार रुपैयाँ सहयोग गरेका हुन्।

वन कार्यालयले दश लाख राहत प्रदान गर्ने भएकामा तत्कालका लागि ५० हजार रुपैयाँ प्रदान गरेको हो भने थप नौ लाख ५० हजार रुपैयाँ केही दिनभित्र उपलब्ध गराइने बताइएको छ। अध्यक्ष थापाले मानिसको जीवनसँग पैसाको तुलना हुन नसक्ने बताउँदै पीडितलाई मलम लगाउन र सरकार जनताको साथमा छ भन्ने अनुभूति दिलाउन राहत रकम उपलब्ध गराइएको बताएका छन्।

घर-गोठ उज्यालो बनाउन आग्रह

विगत केही वर्षयता जिल्लामा चितुवाको आतंक बढ्दो छ। बन्दीपुरमा बालिका आक्रमण गर्ने चितुवाले फेरि मानिसमाथि आक्रमण गर्न सक्ने भएकाले सचेत रहनका लागि साँझ तथा रातको समयमा घर-गोठ उज्यालो राख्न वन कार्यालय तनहुँले आग्रह गरेको छ।

“एकपटक आक्रमण गरेको चितुवाले फेरि मानिसलाई आक्रमण गर्नसक्ने सम्भावना हुन्छ, त्यसका लागि सतर्क बन्नुपर्छ”, डिभिजन वन प्रमुख कोमलराज काफ्लेले भने, “घर–गोठ बलियो पाराैँ, झाडी सफा गराँ, बिहान साँझ एक्लै नहिँडौँ, बच्चालाई एक्लै घर बाहिर नपठाऔँ, बच्चा तथा वृद्धको विशेष ख्याल र रेखदेख गरौ।”

मृग वन कुखुरालगायत वन्यजन्तुको शिकार गर्दा आहाराको अभाव भई चितुवाले मानिसको शिकार गर्ने गरेको उल्लेख गर्दै उनले भने, “वन्यजन्तुको चोरी शिकार गर्नेलाई पक्राउ गर्न सबैले सहयोग गर्नुपर्छ।” १ फागुन २०७४ मा पहिलोपटक भानु नगरपालिका–३ दोरदोरका छ वर्षिय विशाल श्रेष्ठको चितुवाको आक्रमणबाट मृत्यु भएको थियो । त्यसयता चितुवाको आक्रमणबाट जिल्लाका ११ बालबालिकाले ज्यान गुमाएका छन्।

 

Leave a Reply

Your email address will not be published.

सम्बन्धित

ट्रेन्डिङ

Copyright © 2022 Digital House Nepal Pvt. Ltd. - All rights reserved