मुगुको फुलीमा जीप दुर्घटना, तीन घाइते

नेपालभ्युज

काठमाडौं। ब्रेक फेल भएर अनियन्त्रित हुँदा मुगुको फुली भन्ने ठाउँमा जिप दुर्घटना भएको छ। भे १ ज १०९९ नम्बरको सो जीप दुर्घटना हुँदा तीन जना घाइते भएका छन्। जीप सडकबाट करिब ३ सय मिटर तल खसेको छ। सोरु गाउँपालिकाको तारापानीबाट सदरमुकाम गमगढी बजारमा आउँदै गरेको जिप दुर्घटना भएको हो।

जीपका सञ्चालक वीरेन्द्र मल्ल, हुम्ला सर्केगाड गाउँपालिकास्थित सिटिजन बैंकका शाखा प्रबन्धक कलम सेजुवाल र उनीसँगै गएका एकजना गम्भीर घाइते भएको जिल्ला प्रहरी कार्यालय मुगुले जनाएको छ।

टाउकोमा गम्भीर चोट लागेकाले सेजुवाललाई विमानमार्फत नेपालगन्ज लगिएको छ। बाँकी घाइतेको मुगु अस्पतालमा उपचार भइरहेको प्रहरीले जनाएको छ।