दशैंसँगै महँगी बढ्यो, बढेन बजारको रौनक

दशैं शुरु भइसक्दा पनि बजारमा सामान किनमेल गर्नेको चहलपहल बढ्न सकेको छैन तर सामानको मूल्य भने बढ्न थालेको छ।

दशैंसँगै महँगी बढ्यो, बढेन बजारको रौनक

म्याग्दी। आजबाट दशैं शुरु भएको छ। दशैं शुरु भइसक्दा पनि बजारमा सामान किनमेल गर्नेको चहलपहल बढ्न सकेको छैन तर सामानको मूल्य भने बढ्न थालेको छ।

विगत दुई वर्ष अघिसम्म दशैं शुरु हुनुभन्दा १५/२० दिन अघिदेखि नै भीडभाड लाग्ने म्याग्दीको सदरमुकाम बेनी बजारका पसलमा दशैंं शुरु भइसक्दा पनि कुनै रौनक नदेखिएको व्यापारी बताउँछन्। कोरोना भाइरस सङ्क्रमणको त्रास र आम उपभोक्तासँग आम्दानी कम भएकाले अत्यावश्यक सामानबाहेक अन्य सामान खरिद गर्नेको सङ्ख्या कम भएपछि व्यापार बढ्न नसकेको व्यापारीको भनाइ छ।

सधैँ भीडभाड हुने न्यूरोड, इन्द्रेणी टोल, क्याम्पस चोक, पिपलचोक, कालीपुल, सङ्गमचोक र बालमन्दिर चोकलगायत जिल्लाका ग्रामीण बजारमा सामान किनमेल गर्ने ग्राहकको सङ्ख्या अझै बढ्न सकेको छैन। दशैं आइसक्दासमेत खासै व्यापार बढ्न नसकेको व्यापारी बताउँछन्। रेडक्रस मार्गको कपडा पसलका सञ्चालक प्रकाश सापकोटाले यो वर्ष खासै लत्ताकपडाको कारोबार बढ्न नसकेको बताए। “दशैंको बेला अन्य मौसमको तुलनामा दोब्बर/तेब्बर कारोबार हुने गरेको थियो”, उनले भने, “यो वर्ष नयाँ कपडा नआएको र कोभिडका कारणले गर्दा आम मानिससँग आम्दानी कम हुँदा आवश्यक पर्नेले मात्र सामान किन्ने गरेकाले पनि व्यापार राम्रो छैन।”

व्यवसायीका अनुसार एक वर्षमा हुने कारोबारमध्ये दशैंमा मात्र करीब ४० प्रतिशत कारोबार हुन्छ। दशैंमा मीठो खाने, नयाँ लुगा लगाउने चलन भएकाले पनि यही समयमा व्यापार ह्वात्तै बढने गर्दथ्यो। तर यो वर्ष व्यापार सामान्य भए पनि विगतका वर्षको अनुपातमा हुन नसकेको सापकोटाले जानकारी दिए।

म्याग्दी उद्योग वाणिज्य सङ्घका अनुसार बेनीमा करीब दुई हजार पसल दर्ता भएका छन्। चाडपर्वको बेला खाद्यवस्तु, सवारीसाधनदेखि लत्ताकपडाको व्यापार यतिबेला बढी हुनेगर्छ। म्याग्दी उद्योग वाणिज्य सङ्घका निवर्तमान अध्यक्ष उत्तम कर्माचार्यले पनि यो वर्ष दशैंको सामान किनमेल गर्नेको खासै चहलपहल नबढेको बताए। दशैँमा सबैले नयाँ कपडा लगाउने भएकाले लत्ताकपडाको मात्रै करीब ७५ प्रतिशत कारोबार हुने व्यापारीले बताएका छन् । कोभिडका कारण गतवर्ष चाडबाडका बेला बजार ठप्प भए पनि यसपाली भने केही व्यापार भइरहेको व्यवसायीको भनाइ छ।

चाडबाडमा कारोबार राम्रो हुने भए पनि कपडाको भाउ महँङ्गिएको व्यवसायीको भनाइ छ । गतवर्ष दुई हजार हाराहारीमा पाइने कपडा यस पटक दुई हजार ५०० सम्म पर्ने बेनी पिपलचोकका व्यवसायी निर्मल खत्रीले बताए। यो वर्ष बजारमा अधिकांश सामानको मूल्य बढेको उनको भनाइ छ। समयमै सामान आइनपुगेको र लागत मूल्य नै महँगो परेकाले मूल्य बढ्न गएको व्यापारी बताउँछन्।

Leave a Reply

Your email address will not be published.

सम्बन्धित

ट्रेन्डिङ

Copyright © 2022 Digital House Nepal Pvt. Ltd. - All rights reserved