पत्नीलाई बेचेको अभियोगमा पतिसहित दुई पक्राउ  

काठमाडौं। पत्नीलाई भारतको वेश्यालय पुर्‍याएर बेचेको अभियोगमा पीडितका पतिसहित दुई जना पक्राउ परेका छन्। मंगलबार पीडित महिलाका पति ३४ वर्षीय सुमित (नाम परिवर्तित) र नुवाकोट दुप्चेश्वर गाउँपालिका–१ का पासाङ तामाङ पक्राउ परेका हुन् ।

पीडित महिलाका पति सुमितले प्रेम सम्बन्धबाट विवाह गरेका थिए। उनले ५ सन्तानको जन्म भइसकेपछि २०७१ मा १ लाख ६० हजार रुपैयाँ लिएर पासाङलाई जिम्मा लगाएका थिए ।

पासाङले ती पीडित महिलालाई काम लगाइदिन्छु भन्दै बालाजुको होटेलमा लगेर एक महिलालाई जिम्मा लगाए।त्यसपछि पासाङ फरार भएका नेपाल प्रहरीको मानव बेचबिखन अनुसन्धान ब्युरोको भनाइ छ ।

महिलाले घरायसी काममा लगाई मासिक १० हजार रुपैयाँ दिन्छु भनी आफ्नो कोठामा तीन दिनसम्म राखेको अनुसन्धानबाट खुलेको छ। पछि भिनाजु भनिएका व्यक्तिलाई बोलाई जिम्मा लगाएको र उनले सुनौली नाका हुँदै ट्रेनमा राखी भारतको नयाँदिल्लीस्थित म्हेण्डो तामाङको घरमा पु¥याएको प्रहरीले जनाएको छ। पीडित महिलालाई नयाँदिल्लीस्थित नेपाली राजदूतावास र शक्ति समूहको सहयोगमा यही ३१ जेठमा उद्धार गरिएको थियो ।