कांग्रेस १४ औँ महाधिवेशन

रोकिएका सात जिल्लामा वडा अधिवेशन हुँदै

कांग्रेसले रोकिएका २० जिल्लाको वडा अधिवेशन ५ असोज अर्थात आज एकैदिन हुने गरी कार्यतालिका निर्धारण गरेको थियो ।

नेपाल भ्यूज

रोकिएका सात जिल्लामा वडा अधिवेशन हुँदै

काठमाडौं। नेपाली कांग्रेसको १४ औँ महाधिवेशनअन्तर्गत विभिन्न जिल्लामा रोकिएको वडा अधिवेशन आज हुँदैछ। वडा अधिवेशन रोकिएका २० जिल्लामध्ये आज सात जिल्लामा अधिवेशन हुँदैछ ।

कांग्रेसको केन्द्रीय निर्वाचन समितिका अनुसार आज सिन्धुपाल्चोक, काभ्रेपलाञ्चोक, काठमाडौँ, बाजुरा, कपिलवस्तु, बर्दिया र मोरङमा वडा अधिवेशन हुँदैछ। २० मध्ये सात जिल्लामा आज वडा अधिवेशन हुन लागेको समितिका संयोजक महादेवप्रसाद यादवले जानकारी दिए।

कांग्रेसले रोकिएका २० जिल्लाको वडा अधिवेशन ५ असोज अर्थात आज एकैदिन हुने गरी कार्यतालिका निर्धारण गरेको थियो । बाँकी १३ जिल्लाको क्रियाशील सदस्यता विवरण समयमै समितिलाई प्राप्त हुन नसकेका कारण ती जिल्लामा भने वडा अधिवेशन निर्धारित समयमा हुन नसकेको हो ।

कांग्रेसले यसअघि ५७ जिल्लामा वडा अधिवेशन सम्पन्न गरिसकेको छ । कांग्रेसको वडा अधिवेशन गत भदौ १८ गतेदेखि शुरु भएको हो ।

निर्वाचन समितिले वडा अधिवेशन बाँकी रहेका प्रदेश नं २ का आठ जिल्ला तथा सुर्खेत, डोल्पा, रसुवा, रुपन्देही र कैलाली गरी १३ जिल्लाको क्रियाशील सदस्यता विवरण प्राप्त भएसँगै समय तोकेर अधिवेशन हुँदै जाने जनाएको छ।

करिब नौ लाखको संख्यामा रहेका कांग्रेस क्रियाशील सदस्य पार्टीको वडा अधिवेशनका मतदाता हुन् । क्रियाशील सदस्यले आफ्नो वडाको वडा समिति र क्षेत्रीय प्रतिनिधि चयन गर्छन् ।

कांग्रेसले महाधिवेशनअन्तर्गत गाउँ/नगरपालिका अधिवेशन यही असोज ९ गते, प्रदेशसभा क्षेत्रीय अधिवेशन असोज १२ गते र प्रतिनिधिसभा क्षेत्रीय अधिवेशन, एक मात्र प्रतिनिधिसभा निर्वाचन क्षेत्र भएको जिल्ला अधिवेशन असोज १५ गते निर्धारण गरेको छ ।

त्यस्तै एकभन्दा बढी प्रतिनिधिसभा निर्वाचन क्षेत्र भएको जिल्ला अधिवेशन असोज १८ गते, प्रदेश अधिवेशन कात्तिक १० देखि १२ गतेसम्म र केन्द्रीय महाधिवेशन आगामी मंसिर ९ देखि १३ गतेसम्म तय भएको छ ।

Leave a Reply

Your email address will not be published.

सम्बन्धित

ट्रेन्डिङ

Copyright © 2022 Digital House Nepal Pvt. Ltd. - All rights reserved