ओमानमा पीएनजीसँग भिड्दै नेपाल

काठमाडौं। नेपाली राष्ट्रिय क्रिकेट टिमले आज पपुवा न्यूगिनी (पीएनजी)को सामना गर्दैछ। ओमानको अमिरात क्रिकेट मैदानमा नेपालले आज पीएनजीको सामना गर्न लागेको हो।

आईसीसी विश्वकप क्रिकेट लिग-२ अन्तर्गत ओमान र अमेरिकासँगको त्रिकोणात्मक एकदिवसीय सिरिज खेल्नका लागि ओमानमा रहेको नेपाली टिमले सिरिजअघि पीएनजीसँग खेल्न लागेको हो।

दुई एकदिवसीय अन्तर्राष्ट्रिय खेलको सिरिज अन्तर्गत नेपालले आज पीएनजीसँग पहिलो खेल खेल्न लागेको हो। नेपाल र पीएनजीबीचको खेल अमिरात क्रिकेट मैदानमा नेपाली समयअनुसार बिहान सवा ११ बजे शुरु हुनेछ। दोस्रो खेल भने आगामी शुक्रबार हुनेछ।

यसअघि, एकदिवसीय फर्म्याटमा ४ खेल खेलेको भए पनि नेपालले पीएनजीसँग पहिलो पटक एकदिवसीय अन्तर्राष्ट्रिय खेल खेल्न लागेको हो। अहिलेसम्मको तथ्यांक हेर्दा नेपालले एकदिवसीयको ४ भेटमा पीएनजीमाथि एक मात्र जित निकालेको छ।

सन् २००५ मा पहिलो भेट हुँदा नेपाल पीएनजीसँग ७० रनले पराजित भएको थियो। त्यसपछि सन् २०१५ मा नेपाल र पीएनजीबीच दुई खेल भए। ती दुवै खेलमा नेपाल पराजित भएको थियो।

आईसीसी विश्व क्रिकेट लिग च्याम्पियनसिप अन्तर्गत युएईमा नेपालले पीएनजीविरुद्ध दुई खेल खेलेको थियो। पहिलो खेलमा नेपाल २ विकेट र दोस्रो खेलमा ३ विकेटले पराजित भएको थियो।

त्यसपछि नेपाल र पीएनजी सन् २०१८ मा फेरि भिडेका थिए। उक्त भेटमा भने नेपाल विजयी भएको थियो। जिम्बावेमा भएको विश्वकप छनोटको खेलमा नेपालले पीएनजीमाथि ६ विकेटको जित निकालेको थियो।

नेपालले १९ महिनापछि एकदिवसीय अन्तर्राष्ट्रिय खेल खेल्न लागेको हो। नेपालले पछिल्लो पटक लिग-२ अन्तर्गत अमेरिकासँग २०७६ को माघ २९ मा त्रिवि क्रिकेट मैदानमा खेलेको थियो।